Covid-19 chungchanga tángte ngaihtuahtu tur committee din

Mizoram sorkar chuan Supreme Court thu angin, jail chhunga Covid-19 inkai darh a nih loh nan hma latu tur High Power Committee to Prevent the Spread of Covid-19 in Jails a din a, chairman atan Gauhati High Court judge Justice Michael Zothankhuma, Mizoram State Legal Services Authority executive chairman ni bawk ruat a ni.

Committee hian Covid-19 laka jail tángte himna tur an ngaihtuah a; Central Jail, Champhai Jail leh Lunglei Jail-ahte jail-in a dawn zawh aia tam táng an awm mek avangin a tihtlem dan tur an ngaihtuah. Tángte chu an chhungte'n an tlawh phalsak a nih rih loh avangin tángte'n an chhungte an biak theih nan Central Jail, Champhai leh Kolasib district jail-ahte mobile phone dah a ni a, jail dangah pawh dah turin hma la mek.

Central Jail-in doctor an nei tawh a, jail dangte pawhin tángte hriselna endik a nih theih nan district hospital-a doctor-te'n a tlem berah kar tin vawi thum tal jail tlawh se, Committee chuan an ti a; bail dilte court-in tunlai boruak thlir chungin ngun takin ngaihtuah se, táng tharte tan inkhung hranna siam ni se, upa leh hriselna chak lote zawng chhuakin inenkawlna ṭha zawk an dawn theih nan hmalak ni se, an ti bawk. High Power Committee-ah hian member atan Home secretary Lalbiaksangi, inspector general of Prisons Maria CT Zuali ruat an ni a; member secretary chu Vanlalenmawia, MSLSA-a member secretary a ni.