Ṭiau leia tángte lak luh an ni

Myanmar-a zin, tun hnaia Mizorama rawn haw tum, Ṭiau lei khâr vanga leia tangkhang mi 20 chuangte chu March 29, Pathianni zan khan Mizoramah hruai luh vek niin, quarantine centre pahnihah khung hran nghal vek an ni. Sorkar thuchhuah tarlan danin, Covid-19 hri darh zel tur laka invên nan Mizoram leh Myanmar inkalpawhna, Zokhawthara Ṭiau lei chu March 21, 2020 aṭangin khâr a ni tawh a, Myanmar-a zin mi 28, Mizoramah haw tumte chu leiah an táng ta a ni.

Zokhawthara duty mek medical team-in an enfi ah hnuah mi pahnih chu March 28 zanah Mizoramah lak luh hmasak an ni a, mi dang 26-te chu March 29 zanah lak luh ve leh an ni. Mi 25 chu quarantine centre - District Panchayat Resource Centre, Keifangtlangah dah hran an ni a, mi dang pathum chu Zokhawthar Land Custom Station-ah dah an ni thung. Champhai district-ah hian sorkarin quarantine centre pathum a siam a, mi 34 an awm mek. Champhai district pumah mahni in lama inkhung hrang (home quarantine) mek mi 434 an awm mek a; medical screening tih tawh mi 1,131 an awm bawk.