Sorkar laipuia Ministry of Health & Family Welfare chuan August 16, 2019 khan India hmarchhak state-te leh union territory-te tana kum 2019-20 atana central pool-a Bachelor of Medicine, Bachelor of Surgery (MBBS) seat a pek zat a tichhuak a, Mizoram tan MBBS seat pek a ni lo; BDS seat erawh panga a pe thung. Mizoramin MBBS seat a neih loh chhan chu medical college a neih tawh vang a nih thu Higher & Technical Education (HTE) department chuan an tarlang.
Mizoram hian kum 2018-19 academic session-ah khan central pool-ah hian MBBS seat 18 leh BDS pasarih a nei a; North Eastern Council (NEC) aṭanga seat 14 a neih leh Zoram Medical College (ZMC)-a seat 70 a neih nen a vaiin seat 102 a nei a ni. Kuminah chuan central pool-ah Mizoramin MBBS seat a neih tâk loh avangin NEC aṭangin seat 14 leh ZMC-a seat 70, a vaiin seat 84 a nei dawn ta a ni.
BDS seat chu Mizoramin kum 2018-19 khan seat 14 a nei a, chungte chu central pool leh NEC-ah pasarih ve ve a ni a; kuminah chuan central pool-a seat hmuh zat pahniha tihtlem a nih tâk avangin Mizoramin seat 12 chiah a nei dawn. NEC hnuaia NEC aṭanga seat hmuh zat chu nikum leh kuminah a inang.
Hetih lai hian, MBBS leh BDS zir tur thlanna National Eligibility cum Entrance Test (NEET)-a ti ṭha, MBBS zir tura central pool chang phak tura inngai ṭhenkhatte chu ZMC-ah an lut phawt nia thu dawn a ni. ZMC-a zir mekte chuan Vanglaini palai zawhna chhangin, "Central pool nghah pahin ZMC-ah admission kan ti a, HTE department hotute'n central pool a lo chhuah chuan ZMC aṭanga chhuakin, central pool kan thlan theih thu an sawi a ni," an ti a; mahse, central pool a awm tâk loh avangin ZMC-a zir zui zel a ngaih tur thu an sawi.
NEET-a ti ṭha zual ṭhenkhat, central pool chang ngei tura inngai zingah NEC leh ZMC-a Mizoramin quota a neih thlang lo a, central pool lo nghak an awm bawk a; mahse, Mizoramin central pool-ah seat a neih tak loh avangin engtin nge an awm zel dawn an hre lo.
Central pool nghaktute chuan, HTE department hotute'n central pool hmuh ngei an inbeisei avangin NEC leh ZMC-ah seat awmte thlang loa central pool nghak an nih thu Vanglaini palai an hrilh a, "Central pool Mizoramin a nei dawn lo tih hriat a nih hnuah department lam aṭangin thu dawn kan la nei lo," an ti.
NEET-ah hian Mizoram aṭangin mi 595 an tling. Mizoram bikah pakhatna leh pahnihna chuan an lehkha zirna Delhi-ah seat an dil a, pek an ni a; pathumna chu hnam dang a ni. Central pool nghâk tawptute chu an tih ṭhat dan
aṭanga chhûtin, Mizoramin central pool-ah seat nei se chuan chang ngei tura ngaihte an ni.
Mizoramin central pool-ah MBBS seat a neih tâk loh chungchangah hian HTE department chuan August 17, 2019 khan thuchhuah an siam a; Ministry of Health & Family Welfare-in India rama state ṭhenkhat, medical education lama hnufual bikte tan kum tin central pool quota aṭangin MBBS leh BDS seat a pe chhuak ṭhin a, mahni puala medical college nei state-te erawh chu seat pek an nih loh thu an tarlang.
HTE thuchhuah chuan, "Kumin 2019-20 academic session-ah hian kum hmasa lama central pool quota MBBS seat lo dawng ṭhin, kumina dawng ta lote an awm nual a, hei hi a chhan chu, heng state-te hian anmahni puala medical college an neih vang a ni," a ti.
Sorkar laipuiin Ministry of Health & Family Welfare kaltlangin ZMC din nan sum tam tak Mizoram sorkar a rawn pek thu tarlangin HTE department chuan, "Nikum lamah ZMC-ah Mizoram chu seat 100 pek a ni a, kuminah pawh seat 100 bawk pek a ni leh dawn. Heng avang hian dan angin Mizoram chu central pool quota MBBS dawng tur a ni tawh lo. Sorkar laipui hmuh danah chuan, mahni kea ding thei leh puitling tawh ang a lo ni ta a ni," a ti. Central pool-a MBBS seat neih ngai loa awm chu sorkar lam aṭang chuan thil lawmawm tak a nih zawk thu an tarlang.
HTE department tarlan danin, nikum lama central pool-a MBBS quota hmu Arunachal Pradesh, Manipur, Daman & Diu leh Dadar & Nagar Haveli te pawhin MBBS seat an hmu tawh lo a, a chhan chu anmahni puala medical college an neih vang a ni.
Kum 2018-19 chhunga Central pool-a MBBS seat nei, kum 2019-20 chhunga nei tawh lote
1. Arunachal Pradesh
Kum 2018-19: MBBS - 25, BDS - 3
Kum 2019-20: MBBS - Nil, BDS - 3
2. Manipur
Kum 2018-19: MBBS - 5, BDS - Nil
Kum 2019-20: MBBS - Nil, BDS - Nil
3. MIZORAM
Kum 2018-19: MBBS - 18, BDS - 7
Kum 2019-20: MBBS - Nil, BDS - 5
4. Daman & Diu
Kum 2018-19: MBBS - 8, BDS - 2
Kum 2019-20: MBBS - Nil, BDS - 2
5. Dadar & Nagar Haveli
Kum 2018-19: MBBS - 9, BDS - 2
Kum 2019-20: MBBS - Nil, BDS - 2
Kum hmasaa central pool MBBS seat dawng ṭhin, medical college neih loh vanga kumina la dawng chhunzawm zelte
1. Meghalaya
Kum 2018-19: MBBS - 42, BDS - 3
Kum 2019-20: MBBS - 50, BDS - 3
2. Nagaland
Kum 2018-19: MBBS - 30, BDS - 3
Kum 2019-20: MBBS - 40, BDS - 3
3. Lakshadweep
Kum 2018-19: MBBS - 2, BDS - 2
Kum 2019-20: MBBS - 4, BDS - 2
4. Sikkim
Kum 2018-19: MBBS - 4, BDS - 3
Kum 2019-20: MBBS - 4, BDS - 3
