KHAWTHLIR

August 17, Inrinni khan Mizoram hmun hrang hranga mi 288-in a thlâwnin thisen an pe. ṬKP Aizawl Coordination buatsaihin Bawngkawn Bial ṬKP-te'n Aizawl Civil Hospital (ACH) tan thisen unit 93 an pe a; ACH Blood Bank-ah Khawbel Students Union-in unit 29, MSU, Thingsaiin unit 27, SAY Dinthar CO Bial-in unit sarih, SAY, Sairang CO Bial-in unit 12 an pe a, individual voluntary donor paruk an awm bawk. Mizoram Gorkha Youth Association, Kolasib-in Kolasib District Hospital tan unit 36 an pe a, Aizawl Branch KṬP-in Synod Hospital tan unit 30 an pe. Sethlun Branch YMA-in Lunglei Civil Hospital tan unit 26 an pe a, LR Security Services, Ramhlun North-in State Referral Hospital-ah unit 22 an pe bawk.

Central YMA hnuai­a SRS leh Excise & Narcotics hnuaia Anti Narcotic Squad-te chuan nimin zing dar 9 khan Millennium Center bulah ganja gram 2,839 an man a, a neitua puh Lalṭhazuala (25) s/o Roṭhuama, Kulikawn, Aizawl nia insawi an man bawk. SRS hotute chuan, Shillong lam aṭangin Mizoramah ganja a luh tam thu leh ganja lak luhnaah zirlai an tel ṭhin thu an sawi a; zirlaite chu fimkhur turin an chah a ni.

YMA Sub-Headquarters president C Liankunga'n damlo khawsak harsa zawkte'n damdawi-ina an inenkawl laia man chawi loa an awmna tura siam Khualbûk chu Inrinni khan Health secretary H Lalengmawia'n a hawng. Khualbûkah hian riahna bakah, eirawngbâwlna choka, buhfai, gas leh mamawh thil dang dah a ni a, Kolasib khaw pawn lam mi, Kolasib damdawi-ina inenkawl, thlenna tur nei lote chu a thlàwnin an awm thei dawn a ni.

Minister of state TJ Lalnuntluanga chuan August 17, Inrinni khan a bial chhunga Champhai Bethel Veng, Dilkawn leh Kelkang-te a tlawh a, khawtlang hruaitute nen inkâwmin, khawtlang mamawhte an sawiho. Minister chuan, khawtlang hruaitute'n an mamawh an thlente chu a theih ang anga tihhlawhtlin a tum thu a sawi rualin, tihhlawhtlin nghal vek theih a nih loh thu a sawi a; khawtlang hruaitute leh mipuite chu khawtlang leh ram tana ro tling tur siam kawnga amah ṭawiawm turin a sáwm a ni.