MLA fund-ah rualbanlo hmanraw leina telh Ruang phurhna motor lei phalsak an ni

Planning & Programme Implementation department chuan tun hnai khan MLA fund tia hriat, MLA Local Area Development Scheme (MLALADS) kaihhruaina thar a tichhuak a; rualbanlote tana hamṭhatna ṭhenkhat pek theihna tur telh a ni. Hei bakah hian MLA-te'n ruang phurhna motor an leina chu kum 2016-a MLA pakhat hnena Planning department-in kaihhruaina tlawhchhana a remtihsak avangin kalpui zel a ni.

Planning & Programme Implementation department hian MLA fund hman theihna chi hrang 23 a siam a, chu'nga no. 23-na chu tun hnaia an tihchhuaha tel thar, rualbanlote tana hamṭhatna pek chungchang a ni. No. 23-ah chuan, 'Bialtu MLA-te'n a dik ngei tih an finfiah hnuah rualbanlote chu hearing aid leh wheelchair pek theih a ni ang,' tih a ni. Heng bakah hian, no. 22 pawh siam ṭhat a ni a; MLALADS kaihhruaina hmasa zawka inziak, 'Educational purposes' tih chu 'Educational institution' tiin an dah.

Thingtlang bialtu MLA-te'n an bial chhung mi thi an awmin, ruang an thawnna atana motor an lo lei tawh ṭhin a, chu chu sorkar hmasa hun lai, kum 2016-a MLA pakhatin Planning & Programme Implementation department-a a dil chhuah tawh a ni a; Planning department chuan MLALADS kaihhruaina no 2-a 'Salient Features of the Scheme' hnuaia sub-no. 2.3 hmangin a phalsak a ni.

MLALADS kaihhruaina bung leh cháng tlawhchhana Planning department-in an phalsak chu, Tuikum bialtu MLA Lalrinawma, tuna Assembly deputy speaker-in morgue van leina kum 2016-a a dilna a ni. Lalrinawma chuan, "Thingtlang bialtu kan nih angin ruang thawn reng a ngai a, a buaithlak khawp mai. A hminga bialtu nih chuan zanlaiah motor kan zawn a ngai a, khawchhiat cháng chuan driver-te hi an damlo duh khawp mai. DC hnenah MLA fund aṭanga morgue van lei kan dil a, list-ah a awm loh avangin DC khan a remti lo. DC thar a rawn awm a, lehkha nen ka thehlut leh a, a tih theih bik loh thu a sawi," a ti.

Lalrinawma chuan, MLA fund guidelines-in a sawi angin, 'MLA-te recommend hi DC-te'n an remtih loh chuan Planning department râwn tur a ni,' a intih angin ráwn turin ka ngen a; Planning lam ràwn a nih hnuah phalna min pe a, DC pawhin min remtihsak ta a ni," a ti a; order-ah chuan, MLA fund aṭangin 'Morgue van lei phal a ni,' tia ziah a nih thu leh ama hming a lan bik loh thu a sawi.

MLA-te'n ruang phurhna motor an lei theihna tura Planning department-in an tlawhchhan chu MLALADS kaihhruaina no 2, Salient Features of the Scheme tih hnuaia sub-no. 2.3 a ni a; chutah chuan, 'The works under this scheme should primarily be assets creation works and purchase of inventory and equipment strictly of public utility as certified by the concerned MLA,' tih a ni. MLA fund hman dan tur kaihhruainaah hian implementing agency atan mimal, political party leh sakhaw lam pawl hman phal a ni lo.

Planning department chuan July 15, 2019 khan MLA fund kaihhruaina a tihchhuah tharah MLA fund hman theihna chi hrang 23 a siam a; chu'ng thil chi hrang 23-te hman theih lohna chi hrang panga a tarlang nghal bawk. MLALADS hman theih lohna chi hrang pangate chu a hnuaia mite hi a ni.

1.    Works belonging to organisations, trust, registered societies, private school or co-operative institution engaged in commercial activities and for profit making activities.

2.    Grants (except for Health & Education) and loans.

3.    Acquisition of land or any compensation for land acquired.

4.    Assets for Individual benefit, except those which are part of approved schemes.

5.    Places for religious  worship.