Beichhua'n Lairam Rescue Centre lung a phúm

Social Welfare minister Dr K Beichhua chuan August 17, Inrinni khan Lawngtlai-Mampui kawnga Lairam Isua Krista Baptist Kohhran (LIKBK) hnuaia Lairam Social Mission-in Lairam Rescue Centre an sak tur lungphùm a phúm.

Dr K Beichhua chuan, ruihhlo dona leh enkawl zui ngaite enkawl thei tura Pathianin Excise & Narcotics department (END) leh Social Welfare department (SWD) a enkawltir chu a lawm thu sawiin, "Ruihhlo chi hrang hrangin kan ram min rún a, kan ṭhalai, kan tu leh fate chhanchhuah ngaiin an awm mek a, anni chhanchhuah leh enkawl chhunzawm hna chu Pathianin kan koah a nghat a, a rawngbawl hna ropui tak a ni," a ti.

SWD Minister chuan, LIKBK-in Lairam Rescue Centre an din tur chu lawmawm a tih thu leh an centre din tur chu SWD hriatpuia din a ni tur chu lawmawm a tih thu a sawi a; ruihhlo ngaite enkawl hna chu department-a thawkte tan chauha thawh zawh sèn a nih loh avangin, ṭhahnemngai taka ṭan la turin kohhran, tlawmngai pawl leh mipui zawng zawng a sáwm a ni.

Lairam Rescue Centre sakna atan hian LIKBK Central Hmeichhe Pawl chuan budget an siam a, cheng nuai 20 an thawh khawm aṭangin bul an ṭan a ni. Dr K Beichhua hian Inrinni vêk khan Lawngtlaia AH&Vety office a tlawh a, National Bank for Agriculture and Rural Development hnuaia Rural Infrastructure Development Fund (RIDF) sum nuai 85 hmanga State Veterinary Hospital sak mek a enfiah. Vety Hospital sak hna hi AIE Construction, Aizawlin an thawk a ni.

SWD Minister chuan thingtlanga mi rethei zawkte'n pawl 6-12 thleng a thlawna an zir theihna tur, Ministry of Tribal Affairs aṭanga cheng vbc. 16 hmuh hmanga Lawngtlai dáia Eklavya Model Residential School (EMRS) sak mek te, Lairam Motherless Home leh Lairam Christian Medical Centre & Hospital-te a tlawh bawk.

Lairam Christian Medical Centre & Hospital hi September 19, 2001-ah Lawngtlai Barzar Vengah din niin, a tirah chuan damdawi dawr aṭanga ṭan a ni a, minister Dr K Beichhua leh a nupui Dr Zochhuanawmi te pawh a bul ṭannaah hian an tel a ni.

Hospital building thar, Lawngtlai College Venga mi chu kumin February 14 khan hawn a ni a, khum 65 leh cabin 11 awmin, doctor panga, nurse 29, technician pasarih, pharmacist pakhat leh thawktu dang 44-in an enkawl mek a ni.