CM Zoramthanga huanah Raw ṭiak 4,000 vel phun a ni - ZPM
Zoram Peoples' Movement (ZPM) party general secretary-te chuan Lengte rama huan pakhatah mau/rua ṭiak 4,000 vel phun a nih thu leh phun belhna tur hmun zau tak ruahman sa a awm thu an tarlang a, "Huan enkawltute sawi dan chuan, he huan hi chief minister Pu Zoramthanga huan a ni," an ti.
ZPM general secretary pasarihte chuan August 17, Inrinni khan Léngte rama raw ṭiak khawina (hardening plant farm) an tlawh a; an hmuh dan chuan, raw ṭiak khawina hmun atana ruahman chu a dung metre 300 vel, a vâng metre 100 vela zau a ni.
Greenhouse puan (shade net)-a khuh huam chhungah ft. 100 bial vela zauah raw ṭiak, feet khat (inches 12) danah phun a ni a; phun belhna tur hmun âwl zau tak chu thlawh fai sa, ar êka siam leiṭha phul tawh a awm bawk. Huan enkawltute'n an sawi dan chuan, kumin July thla khan raw ṭiak 3,000 a thleng a, August thlaah 10,000 a thleng leh a ni. An pute'n an hrilh dan chuan, raw ṭiakte chu India chhim lam aṭanga lak luh a ni.
Zawhna chhangin huan enkawltute chuan, Chief Minister chu zing karah a kal zeuh ṭhin tih an sawi a, "A fapain a rawn tlawh ṭhin a, mawhphurtu deuh ber chu Pu Ropuia niin an sawi," an ti. Sorkar lam mi emaw, department lama mi thiam emawin an tlawh tawh leh la tlawh loh zawhna chu huan enkawltute chuan, chutiang mi an la hmuh loh thuin an chháng.
ZPM general secretary-te hian Lengte rama huan chu Mizoram sorkar flagship programme tihlawhtling tura bul ṭanna atan Chief Minister hian raw ṭiak supply hnaah hma hruai a tum nia an ngaih thu an sawi. Tarlan tawh angin, Chief Minister hian Assembly House-ah kumin June thlaa budget session laiin raw ṭiak 3,000 a thlen tawh thu a sawi tawh a; July 15, 2019-a Horticulture department-in chawimawina dawn Aijal Club-a an lawmnaah a sawi leh bawk.
Hetih lai hian, Hoticulture department chuan RTI Act zawhna July thla tawp lama an chhannaah, raw ṭiak a lo thlen thu an hre lo a, supply turin tender pawh chhuah a la nih loh thuin an chháng thung.