CM-in Serampore-ah Carey Day a hmanpui

Chief minister Zoram­thanga chuan Serampore College-in August 17, Inrinnia Carey Day 2019 an lawmna chu khual­lian niin a hmanpui a, Serampore College souvenir 'William Carey: Life and Time' tih a tlangzarh.

CM Zoramthanga chuan, Serampore College chu India hmar­chhak mite tan Pathian thu zirna pawimawh leh Pathian thu thiam leh kohhran hruaitu tam tak chher chhuaktu hlu tak a nih thu a sawi a, ''A hnam anga chhûtin Mizote hi khawvela missionary tír chhuak tam ber zinga mi kan ni a, Mizoram tan Pathian thupek zawm leh a duh dana nun chu kan innghahna lungphùm a ni',' a ti.

Zoramthanga chuan, William Carey-a thusawi lâr tak, 'Pathian aṭangin thil ropui tak beisei la, Pathian tan thil ropui tak tih tum rawh,' tih chu a taka nunpui zel turin Serampore College-a thawkte leh zirlaite a chah. William Carey hi India rama Pathian thu zirnaa sûlsutu leh Serampore College dintu a ni a, amah hriatrengna atan a pian champhaah Carey Day hi hman ṭhin niin, kumin hi a pian champha vawi 258-na a ni.

Carey Day lawmnaah hian Royal Danish Embassy aṭangin deputy head of mission Steen Malthe Hansen pawh a tel a; Denmark sorkar aṭanga zirlaite ṭanpuina (scholarship) sem a nih bakah, zirlai ti ṭhate chawi­mawina hun an hmang. Serampore College-ah hian zirlai 3,500 vel an awm mek a, India rama Pathian thu zirna ṭha berte zinga mi a nih bakah, secular college a ni tel. Tunah hian Mizo zirlai leh thawktu 130 vel an awm a, principal chu Dr Vansanglura a ni.