AMC-in permit an pekte vil zui rawh se - MIMA

Mizoram Merchant Association (MIMA) Gen.Hqrs. hruaitute chuan August 17, Inrinni zing khan Aizawla Mizo hming hawha hnam dang dàwrkai an enfiah leh a; Aizawl Municipal Corporation-in sumdawn phalna a pek chhuah, AMC Licensing Regulation chu a pe chhuaktu AMC-in an vil zui ngai loa an hriat thu an sawi a, AMC chu an permit pek enzui turin an chah.

MIMA chuan hnam dang dawr luahtirtute chu an in luahtir lo tura ngenna lehkha an pek bakah, hnam dang hnena an hming hawhtirtu nia an hriat Mizote chu an hming hawhtir lo turin an ngen nghal. MIMA hian hnam dang dawrkai enfiahna hi Chanmari kâwn aṭanga ṭanin, Bawngkawn veng chhung an tuam a; Vishal Megamart chu a inhawn loh avangin building neitu LRM-te chu an inah kal chilha ngenna pek an tum thu an tarlang.

MIMA chuan thuchhuah siamin, Mizo ṭhenkhat, an hming hnam dang hawhtira sumdawntirtute chu sum duh vanga Mizo hnam himna hralh mektua an ngaih thu an tarlang. AMC chu sumdawn phalna permit an pekte an finfiah lo hlea an hriat thu sawiin, "Permit an pekah Mizo hming ni si, vai lo ṭhu an tam hle. AMC hian an permit pekte hi enfiah ngun se, a dik lo chu cancel ngam se tih hi kan ngaihdan a ni. AMC Licensing Regulation hi 'Mizo hnam chîmpilna tur dan' ni hialin kan hria a ni," an ti.

MIMA hian June thla khan AMC Licensing Regulations-ah hnam himna tur a awm lo nia sawiin, sumdawngte AMC hnuaia inziak lut lo tura an duh thu an lo puang tawh a; AMC Licensing regulation hnuaia inziaklut tura thil tel ngai,  lehkha pawimawhte chu hnam dangte tan pawh awlsam taka neih theih nia sawiin, Aizawl khawpuiah hnam dangin sumdawnna din duhin AMC-ah inziah luh tum ta se, dan theih an ni dawn lo niin an sawi.