Mizoram State Legislative Assembly pariatnaa session hmasa ber, December 18-a ṭan chu ni thum chhung neih niin, nimin khan a ṭiak. Nimina Assembly session-ah chuhtu awm loin Tuikum biala MNF ticket-a thlan tlin Lalrinawma chu chuhtu awm loin deputy speaker atan thlan tlin a ni.
Nimina session ṭan a nih veleh tun ṭum session leh session hnuhnung ber inkara MP leh MLA thi mi pathum - prime minister hlui Atal Bihari Vajpayee leh MLA hlui pahnih C Chawngzuala leh S Laldingliana te sûnna hun hman a ni a; S Laldingliana hi MLA a nih laia thi a ni.
Speaker Lalrinliana Sailo-in a sàwm angin, house leader Zoramthanga chuan AB Vajpayee, C Chawngzuala leh S Laldingliana chanchin a sawi a, "Anni kan chán ta hi India leh Mizoram tan chànna nasa tak a ni," a ti.
Mi pathum sûnnaah hian deputy chief minister Tawnluia, ZPM Legislatur Party leader Lalduhoma, Congress Legislature Party leader Zodintluanga, BJP MLA Dr BD Chakma, Dr R Lalthangliana, Lawmawma Tochhawng leh Dr K Pachhunga ten thu an sawi.
Sûnna hun hman zawhah Speaker chuan Deputy Speaker atan hun tiam chhungin mi pakhat chiahin hming a pek luh thu a sawi a, "Lunglei East bialtu MLA Lawmawma Tochhawng-in Tuikum bialtu MLA Lalrinawma chu deputy speaker atan a rawt a, Lengteng bialtu MLA L Thangmawia'n a thlawp a ni. Mi dang hming pe lut a awm loh avangin Lalrinawma hi chuhtu awm loin tlinga puan a ni," a ti.
Lalrinawma hi house leader Zoramthanga, ZLP leader Lalduhoma, CLP leader Zodintluanga leh BJP MLA Dr BD Chakma ten a ṭhutna turah an hruai a; Lalrinawma chuan, deputy speaker hna chu ṭha taka hlen chhuah a tum thu a sawi.
Nimin vek khan December 19, Nilainia Assembly House-a Governor Kummanam Rajasekharan-a thusawi chungchanga lawmthu sawina motion Lunglei North bialtu MLA Dr Vanlalṭanpuia'n a pu lut a, member eng emaw zatin an sawi zui hnuah pawm a ni.
