CYMA-in Krismas thuchah a tichhuak Duty indah turin YMA branch tin an ngen
Central YMA chuan nimin khan Krismas leh kum thar thuchah an tichhuakin, hlim leh lawm taka hman a nih theih nan mi zawng zawng duhsakna chibai an bûk a; boruak muanawm tak hnuaiah hman a nih theih nan YMA branch tinte chu an huam chhungah duty indah a, hawihhâwmna lantir chunga duty turin an ngen.
Central YMA chuan Krismas leh kum thar thuchah an tihchhuahah hian point panga an ziak lang a; chu'ngte chu mi tinin thlamuang leh hlim taka hunpui an hman theih nan, bawhzui ṭheuh turin YMA branch tinte an ngen a ni.
CYMA Krismas & kum thar thuchah
1. Krismas leh kum thar hi mi tinin hlim leh lâwm taka hman a nih theih nan veng chhungah mi harsa, damlo leh mu lum zo lo an awm em, tih dap chhuakin, chutiang mi an awm chuan a theih leh remchang anga chhawmdâwla ṭanpui ni se.
2. He hunpui hi mi tinin kan nghahhlelh ṭheuh a nih avangin, mi dangte tana harsatna thlen thei, silai lem (inhliam theihna) te, mi tithlabár theitu hâlpuah chi hrang hrangte hâl/zuar lo tur leh lei lo turin mi zawng zawng kan ngen a ni.
3. He hunpui hi ṭhalai leh râwltharte'n nun kawng sual an zir thar hun lai leh kawng ṭha lo an zawh ṭan hun a nih theih ṭhin vangin, puitling tel loin zanah naupang khawlaiah vah chhuahtir loh ni se. Naupangte thlahthlam lo turin chhung tin kan ngen.
4. Boruak muanawm tak hnuaiah he hunpui hi kan hman ṭheuh theih nan branch tinin mahni huam chhungah duty insiamin, mi ṭha leh pawisawilote rilru tina lo zawnga hawihhâwmna lantir chungin duty neih ni se. YMA kumpuan 'Ram leh hnam humhalh' bawhzui zelin, mimal, chhungkua leh khawtlang tibuai thei, a bikin ruihhlo khuahkhirhna kawngah theihtawpa hma la turin branch-tin kan ngen a ni.
5. YMA duh dan leh beiseinate hi a hlawhtlin theih nan sorkar, tlawmngai pawl, kohhran hrang hrang leh mipui ṭawiawmna kan ngen e.