KHAWTHLIR

Thilpek hlan
Lungleia Excise & Narcotics department chuan Nilaini khan Lunglei khawpuia home hrang hrangah Krismas thilpek an an pe a, Rs. 1,02,000 leh thawmhnaw an sem. Excise & Narcortics assistant commissioner Lalhmingthanga chuan, Krismas thilpek an sem chhuah chu lucky ticket an siam aṭanga an sum hmuh leh thawktute thawhkhawm a nih thu a sawiin, "Hetiang hian kumtin Krismas dawn apianga midangte tan kan luang chhuak ve ṭhin a ni," a ti.

NYK intihsiak
Nehru Yuva Kendra Sangathan, Mizoram chuan nimin khan MZP conference hall-ah 'Partiotism and Nation Building' tih thupui hmangin State Level Declamation Contest an buatsaih a, district level-a pakhatna ṭheuhte an intihsiak. Intihsiakna hi Republic Day lawmna pakhat a ni a, pakhatna Candle Vanrempuii, Aizawl district niin, Deborah Ruatpuii Fanai, Lunglei district leh TJ Lalhriatpuii, Champhai district ten an dawt. Pakhatna hian Mizoram aiawhin national level intihsiak, Delhi-a January 21-22, 2019 chhunga neih turah a tel dawn a ni.

Duhoma'n thehlut
MLA inthlan neih zawh taka Aizawl West-I leh Serchhip bial aṭanga thlan tlin Lalduhoma chuan Aizawl West-I bial zawk a chhuahsan dawn tih hriattirna nimin khan Assembly Secretariat-ah a thehlut.

Pisa khâr
Central YMA pisa chu nimin khan kumin atan khar a ni a, CYMA president Vanlalruata'n staff-te hnenah Krismas present a hlan. CYMA pisa hi January 7, 2019-ah hawn ṭan leh a ni ang. Mizoram People Forum (MPF) pisa pawh nimin khan kumin atan khâr a ni a, MPF president Rev. R Lalhmingthanga hoin kharna inkhawm hman a ni; January 10, 2019-ah hawn ṭan leh a ni ang.

Charity Fund hlan
MJA, Kolasib district chuan an member-te zum thawh khawm MJA Charity Fund atana an hmuh Rs. 6,000 chu nimin khan Kolasib District Hospital Poor Fund-ah an hlan. Charity Fund hi MJA Kolasib district vice president Andrew VL Auva'n nursing superintendent Lalrinpuii hnenah a hlan a ni. Vawiin hian fahrah enkawlna Omega Centre, Bairabi Zophai hnenah ṭanpuina an hlan leh bawk ang.