MJA-in Charity Fund an pe chhuak

Mizoram Journalists' Association (MJA) chuan mi harsate ṭanpuina tura MJA Charity Fund-a sum an thawhkhawm Rs. 87,300 chu nimin khan a dawngtu turte hnenah an sem chhuak.

MJA hian kum tin Krismas dawnah mi harsa zawkte ṭanpuina turin Charity Fund an khawn ṭhin a, MJA member-te'n sum an thawh khawm bakah, mi ṭhahnemngai, MJA duhsaktute'n an thawh ve bawk ṭhin. Kumin­ah hian Aizawl Civil Hospital Poor Fund, Guwahati, Kolkata leh Mumbai-a Mizo welfare-te hnena pek turin sum an thawh khawm a; nimin thleng khan mi 100-in Rs. 87,300 an thawh a ni.

MJA chuan Charity Fund sum zinga Rs. 20,000 chu nimin khan Aizawl Civil Hospital (ACH) Poor Fund-ah Rs. 20,000 an pe a; MJA vice president Lalhmangaihzuala Rokhum-in ACH medical superintendent Dr KL Remsanga hnenah a hlan.

ACH Poor Fund tana MJA Charity Fund sum hlannaah MJA president Zonunsanga Khiangte chuan, ACH-in tun thlenga hmingchhiatna lian tham a nei lo chu lawm­awm a tih thu sawiin, "ACH hnathawh hi a ṭha hle a, thlavâng hauhsak tlaka an awm ṭhin hi a lawmawm. Chutih rual chuan, chhan tlak loa a awm a nih chuan an dik lohna puanzar kawngah chanchinbumite an insúm dawn lo a ni," a ti a; MJA chu ACH intineitu tak zingah an tel tih a sawi.

MJA hian Krismas dawnah Charity Fund atan an member-te aṭangin pawisa a khawn ṭhin a, chu chu a remchan angin a mamawhte hnenah hlan ṭhin a ni. Kum 2012 khan mi 78-in Rs. 40,000 an thawh khawm a, chu chu ACH Poor Fund-ah leh ZDU Damna In, Zuangtuiah Rs. 20,000 ve vein an hlan a; kum 2013-ah mi 107-in Rs. 71,170 thawh khawmin, Hermon Childrens Home hnenah Rs. 40,000 an hlan a, MJA member zinga ṭanpui zualte hnenah an hlan bawk.

Kum 2014-ah mi 90-in Rs. 442,00 an thawh khawm a, ACH Poor Fund tan an hlan a; kum 2015-ah mi 92-in Rs. 37,150 an thawh a, ACH Poor Fund-ah an pek bakah, MJA member upa deuhte leh damlote hnenah an hlan. Kum 2016-ah mi 93-in Rs. 45,000 an thawh khawm a, ACH Dialysis ṭanpuina atan an pe. Kum 2017-ah mi 99-in Rs. 1,06,365 an thawh khawm a, ACH Charity Fund-ah an pek bakah, Mumbai, Vellore leh Guwahati-a Mizo welfare-te hnenah an hlan a ni.