Krismas pualin mi 403-in thisen pe tawh

Association for Voluntary Blood Donation (AVBD)-in blood bank-te nen ṭangruala Aizawl Civil Hospital leh Synod Hospital-a Krismas pual­a thisen pek rûnpui an buatsaih mekah thisen unit 403 pek a ni tawh. AVBD chuan Krismas puala thisen pe zel turin Mizo mipuite a sáwm.

Krismas puala thisen pek rûnpui hi December 3, 2018 khan Aizawl Civil Hospital (ACH) Blood Bank-ah ACH medical superintendent Dr KL Remsanga'n a hawng a; ACH leh Synod Hospital Blood Bank-ahte Krismas pualin thisen pek ṭan a ni. Krismas puala thisen petu apiang hnenah ei leh in tur tuihnai bik hlui a ni a, HDFC Bank-in tui ûm (tui paina) ṭha tak an pe zel bawk.

Krismas puala thisen pek hun buatsaihah hian nimin thleng khan mi 403-in thisen an pe tawh a, chu'ngte chu mipa 395 leh hmeichhia pariat an ni. Aizawl Civil Hospital blood bank bikah mipa 388 leh hmeichhia pariatin an pe a; Synod Hospital-ah chuan mipa vek 15-in an pe tawh thung.

AVBD chuan, thisena min tlantu Isua Krista piang lawm nan thisen pe turin Mizo mipuite an sâwm a; Krismas vuak­vêtah pawl hminga thisen pe an tlakhniam ṭhin laiin, thisen mamawh erawh a pun ṭhin avangin thisen petu mamawhna a sang ṭhin a, Mizo ṭhalaite'n tun aia uar lehzuala thisen an pek a ṭul thu an tarlang bawk.