NEXA Independence Day Football Tournament-ah MPL club thar FC Venghnuai chuan Chawnpui FC 4-3 in an hneh a, team inhal pahnih Ramhlun North FC leh Chhinga Veng FC te 2-2 in an inhnehtawk. Group B
aṭanga semifinal lut tur hriatthiam a la har hle.
An inhnehtawk leh ta
Chhinga Veng hian season liam ta khan Ramhlun North ṭum hnih hneh mah se khami hma zawng khan an la hneh ngai lo a, tun ṭumah pawh tun hma ang thoin Chhingcows an tawlhthlu leh.
Coach Lalremruata kaihhruai Chhinga Veng hian first half-ah forward che rang Lalsawmzela leh tawnhriat nei ṭha MC Malsawmzuala te hmangin 2-0 in hma an hruai. Chhingcows hi Remruata hnuaiah chak inbeisei hman mah se Ramhlun North-in second half-ah M. Lalrintluanga leh Lalthankhuma hmangin siphurh an sut zo.
Season ṭan hmaa veng inelna CYMA Football-ah Chhinga Veng hian rinkai zawk nichungin Ramhlun North hi 1-0 in an hneh tawh lo a, tun ṭuma goal hniha hma an hruai chunga an chak zawh loh avangin season bul an ṭan danah an lawm lo ang.
Goal sarih!
FC Venghnuaiin MPL club an nih hnua an match hmasa berah Chawnpui FC 4-3 in an hneh a, an result-ah lawm mah se hun tawp lam minute 15 chhunga goal thum an chhuah avangin an lawm a kim lo ang.
Venghnuaiin tawnhriat nei ṭha Vanlalthanga an kawl a, Hualngohmun tlangval hian chance ṭha hlah mah se minute 34-naa a goal khung erawh a 'class' sanzia a pholang. Thanga ang thoa ball pet thiam Isak Vanlalpeka'n minute 63-naah freekick mawi zetin a khung a, HK Lalhruaitluanga leh Vanlallawma ten khung belh lehin minute 70-naah Venghnuaiin 4-0 in hma an hruai.
HC Zarzoliana enkawl Chawnpui an rawn ṭhangharh a, Lalthanmawia Renthlei-in goal hnih a khung bakah Crespo Vanlalhriatpuia'n khung ve bawkin Venghnuai an talbuai hle. Injury time-ah Chawnpuiin an siphurh sut theihna hun ṭha an hlah.
Venghnuai coach Rindika Hmar chuan, "Kan la naupanna a lang a, club dang aia kan practise tlai kha a lang chhuak bawk. Mahse, kan insiamṭha ang. Pathianin kan tana ṭha turin ro min rel sak zawkah ka ngai. Kan chakna hi kan vice president Pu Mawitea leh ka pi Ziki tan ka hlan e," tiin Vanglaini a hrilh.
