New Zealand captain hlui McCullum a chawl

Brendon McCullum chuan cricket inelna pathum Test, ODI leh T20 aṭanga a chawlh thu a puang a, New Zealand captain hlui hi kum 37 mi a ni.

Keeper-batsman McCullum hian kum 2016 khan ram tana inkhelh a chawlhsan tawh a, Twenty20 specialist niin Indian Premier League-ah player ṭha zingah a tel pha. Kumin Cricket World Cup-a England champion puitu Eoin Morgan khan McCullum hi a dahsang a, inelna ṭan hmain, "A thlir dan tam tak ka entawn. Hruaitu dik tak a ni a, mi bik a ni. A hnuaiah khan New Zealand-in nuam ti takin an khel ṭhin a, kan thik ṭhin hle," tiin Middlesex tana a khelhpui ṭhin player hi a fak.

Mc Cullum chuan, "Inchhirna tur nei loin cricket ka chawl thei ta. Kum 20 chhunga ka inkhelh tawhnaa ka sulhnu leh hlawhtlinna te hi ka chhuang a. Miin kan tih theih china an beisei kan pel a, khawvel hmun danga mite zah kan kai pha hial a ni," tiin a sawi.

Kum 37 mi McCullum hian Test match a khelh hnuhnun berah February 2016 khan ball 54 lekah run 101 a siam a, Test match-a century rang ber a siam. McCullum hian Canada-ah Global T20 a khel zo chiah a, coaching lam a luhchilh ang.