Chanmari nge tla dawn Mizoram Police?
NEXA Independence Day Celebration Football Tournament-ah vawiin chawhnu dar 2:15 hian MFA Super Cup final rematch a awm dawn. Nomawi chawi hlim Mizoram Police FC leh Chanmari FC te pahniha chak lo zawk tan semifinal kawng a inkhar thei.
Police hian an match hmasa berah Aizawl FC chu 5-1 zetin an hneh lo a, Chanmari FC hi MFA Super Cup-a an hneh tawh Electric Veng FC lakah 3-1 in an tlawm. Team ṭha pahnih hian point an la hmuh loh avangin vawiin tlai inkhel tur hi ‘final’ ang hiala chhal theih a ni.
Goal khung harsat
Chanmari FC hian Mizoram Police an hmachhawn hmasak ṭumin goal an khung lo a, I Day Football-ah Electric Veng lakah goal khat khung mah se goal thum an chhuah. S. Malsawmtluanga hote hian insiamṭhat an ngai a nih chuan tlarhma lam tih ṭhat a pawimawh ang.
Mama chuan, “Chak kan duh a nih chuan goal kan khung a ngai. Tun dinhmunah erawh insiamṭhat a la har dawn. Electric Veng kan hmachhawn ṭumin Lalremruata hnawhchhuah a ni a, Police nen kan chhawr thei dawn lo,” tiin harsatna an neih thu Vanglaini a hrilh.
Electric Veng lakah hian goal khungtu Lalnunzama chu chance ṭha hlah hnem ber a ni a, Laipuitlang tlangval hian Police lakah a hming hliauna siam ṭhat a ṭul ang. Chutihrualin Chanmari hian MS. Dawngliana, H. Lalmuankima, Lalrammuanpuia leh Lalremruata (Ramhlun South) ten mawhphurna an lak a ṭul dawn a ni.
Police thinrim
Tun hmain Mizoram Police hi team ṭha leh ṭha lo tehfung an ni a, tun hnaiah rawn insiamṭhain tehfung atana hman theih rawn ni chho mah se Aizawl FC laka an mualpho avangin team ṭha bera tih chhal tur an la ni lo.
Chutihrualin Police chak lo zo thinrim erawh tawnfuh an châkawm lo a, Lalbiaksanga Colney-in a player neih ṭhat ber nen Chanmari FC lakah thawhchhuah an tum dawn. Vawiin tlai inkhel tur hi I Day Football group stage-a inkhel hmuhnawm ber zinga mi a ni.
Group A
August 5, Thawhṭanni
Mizoram Police 1 - 5 Aizawl FC
MPFC : Lalbiakhlua 38’
AFC : Jonathan Lalrawngbawla 36’; Isak Vanlalruatfela 63’; Rochharzela 69’, 74’; David Lalhlansanga 85’
Electric Veng FC 3 - 1 Chanmari FC
EFC : David Lalchhuanawma 11’; Jacob Lalrawngbawla 38’;
Lalengmawia 85’
CFC : Lalnunzama 50’
Vawiin Inkhel Tur
Aizawl FC 12:00 PM Electric Veng FC
Chanmari FC 02:15 PM Mizoram Police FC
August 9, Zirtawpni
Electric Veng FC 12:00 PM Mizoram Police FC
Chanmari FC 02:15 PM Aizawl FC