Smith hoin Australia an chak

Kumin Ashes Test hmasa ber chu August 1-5 chhung khan Edgbaston, Birmingham-ah khelh a ni a, Australia-in run 251 in England an hneh. Test match vawi hnihna hi August 14-18 hian khelh leh tur a ni.

Australia hi coin toss-ah vanneiin bat hmasak an thlang a, batsman hmasa pathum zinga siam tam ber Usman Khawaja-a'n run 13 chauh a siam avangin an talbuai hle. Harsatna karah captain hlui Steve Smith rawn che ṭhain first innings-ah run 144 a rawn siam a, second innings-ah pawh run 142 siam lehin Aussies hnehna an chanpui.

England hian ICC World Cup-a an champion zawhah Ireland nen One-off Test an khel a, an batsman-te tlusawp mah se bowler zarah an tho chhuak.

ODI inelna sang ber World Cup-ah an champion avangin Test-ah pawh England hi an beiseina a sang a, inelna ngaihhlut Ashes-ah hnehna chang thei turah an inngai. England hian bul ṭan ṭhain wicket thum an lakin Australia-in run 35 chauh an la siam a, wicket dang pawh la mawlh mawlhin Aussies-in run 112 siamin wicket riat an la tawh. 

Mahse mualneitu hian Smith an ngam lo a, Australia captain hlui hian run 144 zet vaw chhuakin Peter Siddle (44) chuan a dinpui ve tlat bawk. Australia hian 284 an siam a, chak lo thei dinhmuna ding tawh chu chak ve thei dinhmunah an ding.

England tan opener Rory Burns-a'n run 133 zet siamin first innings-ah mualneitu hian run 374 an siam a, Joe Root captain-na hnuaia khel England an dinhmun a ṭha zawk zel. Amaherawhchu, England hian Smith (142) bawk an ngam lo nawn a, Matthew Wade-a'n run 110 siam bawkin Australia hian second innings-ah 487 zet vaw chhuakin wicket sarih an hloh tihin chak thei turah ngaiin an duhtawk.

England-in chak turin run 398 siam an mamawh a, target umphak theih ni mah se mualphona kawng an zawh zawk. Mualneitu tana che ṭha berin Chris Woakes-a'n run 37 chauh siamin England hi run 146 lekah an thi fai vek.

England captain Joe Root chuan, "Kan khel ṭha thawkhat a, Australia an rawn tho chhuak ṭha em a ni. Innings pahnihah Steve Smith a che a, vawm hlum turin kan thawkrim. Kan chak lo hi pawi kan ti a, hrehawm kan ti hle," tiin a sawi.

Australia captain Tim Paine chuan, "Steve Smith hi chu kan tan a hlu a ni. Tun kar chauh ka sawi lo. Kar hnuhnung paruk vel chhung khan kan team a ti ṭha hle. Test batsman ṭha ber zinga mi a ni a, hma a la sawn zel bawk," tiin an chakna chhan Smith a fak.