Aizawlah AIFF Registration Workshop

All India Football Federation (AIFF) leh Mizoram Football Association buatsaih, football-a player inziah luh dan mumal zawk Centralized Registration System (CRS) leh inkhel kalpui dan mumal zawk Competition Management System (CMS) zirchianna wokshop chu nimin khan Aizawlah ṭan a ni a, August 9 thleng neih tur a ni.

AIFF leh MFA in an buatsaih Workshop-ah hian AIFF a Players' Status and Registration Department hotupa Sankalp Pujari chuan zirtirna a pe a. MFA hnuaia MPL club aiawhte, Under 15 league aiawhte leh MFA committee peng hrang hrang aiawhte an tel a, vawiin lamah District FA-te pualin hun hman a ni leh ang.

Sankalp Pujari chuan thil awm dan sawifiahin - CRS hnuaiah hian state tina football khel ṭhin mipa leh hmeichhia, naupang lamte pawh ziah luh vek tur an ni a, vawi khat in register tawh chuan football khelh hun chhunga hman tawh tur a ni.

CMS hi inkhel buaipui dan kimchang ziah luhna a ni a, club hming, goal score, player hming, an khelh zat, an goal thun zat, an card hmuh dante leh thil dang chhinchhiah vek a ni. Player mal record zawng zawng felfai takin vawn a ni tawh ang.

Kum dik loa khelh ruk pawh CRS hian thui tak a veng thei dawn a, Indian football-in kum chungchanga harsatna a tawh mek tam tak hi a pumpelh tir dawn a ni. Hawnna inkhawm kaihruaitu Lalnghinglova Hmar, MFA Hony Secretary chuan CRS leh CMS chu mumal taka kalpui theih a nih chuan khelmual pawn lama hmasawnna pawimawh tak a nih tur thu sawiin chak taka bawhzui tum a nih thu a sawi a; Mizorama football khel ṭhinte chu khelmual chhunga an ṭhan ruala khelmual pawna tih tur ṭulte ngai pawimawh thiam a, hmasawn zel tum turin a fuih.