Sharapova a chak lo

Hun rei tak a inkhelh theih loh hnuah Maria Sharapova chu WTA Rogers Cup-ah a inlan a, Russian nula hian beisei nei sang hman viau mah se Anett Kontaveit hneh loin a zinkawng a tawp.

Nimin zing inkhelah Grand Slam vawi nga champion tawh Sharapova hi darkar hnih leh minute 41 an inkhelh hnuah 4-6, 6-3, 6-4 in a chak lo, tlawm mah se a hliam a dam tawh avangin a tan lawmna tur a awm tho.

World number 1 hlui Sharapova chuan, "Match hmasa ber khel tur pawh hian training hautak ka neih a ngai, chak lo mah ila ka taksa a dam tawh avangin lawmna tur tam tak a awm. Result chauh ka thlir lo, nuamti taka tennis khelh hi chu a hlimawm a ni," a ti.

Inkhel dangah Australian Open champion hlui Caroline Wozniacki chuan hnehna changin second round a lut a, vawiin hian player langsar Serena Williams leh Elise Mertens te chuan an match hmasa ber an khel thung ang.

Tun hma lama a champion tawhna hmunah Wozniacki a zam lo, world number 1 hlui hian Yulia Putintseva chu 6-4, 6-2 in a hneh. Grand Slam vawi thum champion tawh Angelique Kerber erawhin beisei a phak lo, German nula hi Jelena Ostapenko lakah 0-6, 6-2, 6-4 in a chak lo.

British number 1 Johanna Konta pawhin beisei a phak bik lo, world number 14 hi Ukrainian tleirawl Dayana Yastremska lakah 6-3, 6-2 in a chak lo. World number 33 Yastremska-i'n a ball vuak nat a chhawr ṭangkai, vawi 24 ngawt winners vaw chhuakin darkar khat leh minute 21 chhungin hnehna a chang.