Kolasib nula Lalremsiami Hmar goal mawi hmangin India nula ten Italy 3-0 a sawpin Women's Hockey World Cup 2018 quarterfinal an lut.
Mizo nula hian kum 1978 World Cup hnua a vawi khat nan India hmeichhe team chu a sang pariatah a vaw kai a, player of the match-ah thlan a ni.
Thawhlehni zan khan Lee Valley Hockey and Tennis Centre-ah India leh Italy ten quarterfinal lut tur zawk zawn nan playoff an khel a, India tan Kolasib nula Siami (9'), Neha Goyal (45') leh Vandana Katariya (55') ten goal an khung laiin, Azzurre lamin a chhan letna an nei lo.
Zanin dar 10:30 hian Ireland nen semifinal luh an inchuh zui leh nghal ang–inkhel hi Star Sports 2-ah en theih a ni ang.
Siami Goal
A chak lo zawk tan hmun a awm tawh dawn lo tih hre lawkin ram pahnih an inhmachhawn a, hamrik hmasa ber a rik aṭanga a hnuhnung ber ham a nih thlengin boruak a nung tluan chhuak zak a; khaikhawmna awlsam chu 'inkhel hmuhnawm thunun thei zawk India an chak' tih a ni.
India lamin na takin an nawr nghal a, Navjot Kaur-i penalty corner hlawh chhuah chu goal-ah chantir lo mah se, long corner an hmu zui. Mual ding lam aṭanga ball kal chho chu vei lam sira awm Lalremsiami tan vuak harsa tak tura ngaih a ni.
Amaherawhchu, hmun chep leh chawpchilh tak karah Kolasib nula Siami a insiamrem hman a, ball dan tuma rawn inpumpek Italian goalkeeper Martina Chirico dan hman lohin mawi zetin a lehkhawn (reverse hit) lut–goal khat an neih avangin India tan kawng a awlsam sawt.
India an chungnung
World number 10 India hian an mahni aia hniam zawk Italy (17) lakah zahngaihna an lantir zui lo, goal hnih dang an khung belh hma pawhin na takin an nawr zui reng a, Sjoerd Marijne nau ten 1978 hnua a vawi khat nan Women's Hockey World Cup-ah quarterfinal an thleng hi a mak lo.
Pool A-ah South Korea leh China te chunga awm thei Italy lamin thi leh dam kara leng an nih zia hriain thapui an thawh let, mahse India tlarhnung lam an chesual duh lo. Martina Chirico vuak luh tur dangtu keeper Savita Punia chu India him nana tha thawhtu pawimawh a tling.
India captain Rani Rampal-i'n United States lakah goal pawimawh a khung hnuah khung zui lo mah se, ran tana match 200 chuang khel tawh forward hian Italian defender a chhaih buai thei hle a, buai nuaih kara goal hnihna khungtu Neha leh, penalty corner chawr ṭangkaia chak nemnghehna ti luttu Vandana pawh a langsar hle.
India dinhmun
Tun hma chuan India nulate hi khawvel huapin sulhnu ṭha an nei tawh ṭhin, 1974 World Cup leh 1980 Moscow Olympic-ah te palina an ni a, 1982 khan Asian games-ah gold medal an vaw chhuak zui leh bawk. World Cup bikah chuan kum 40 hnuah a vawi khat nan quarterfinal an thleng ve leh chiah.
Hun hmasa lamah khawvel hriat an ni a, mahse ropuina dang chang leh tur erawhin an nghah rei a ngai ta vang vang hle. 2002 khan Commonwealth Games-ah gold an lak leh nawlh hnuin, 2003 leh 2017 khan Asian Cup an chawi leh bawk a ni–ropuina an chan hnuhnung ber hian Lalremsiami chu player pawimawh a ni phak tawh.
World Cup Pool B-ah India hian Ireland hneh lo mah se a thlengtu England leh United States te an inhnehtawkpui thei a, playoff an khelh theih phah. Quarterfinal hi an paltlang leh thei a nih chuan Germany leh Spain inkhela chak zawk nen semifinal an khel leh dawn a ni.
India Squad:
Goalkeepers: Savita (vice capt), Rajani Etimarpu.
Defenders: Deep Grace Ekka, Sunita Lakra, Deepika, Gurjit Kaur, Reena Khokhar.
Midfielders: Namita Toppo, Lilima Minz, Monika, Udita, Nikki Pradhan, Neha Goyal.
Forwards: Rani Rampal (capt), Vandana Katariya, Lalremsiami, Navneet Kaur, Navjot Kaur.
Thlirna Tawi
A hun: July 21–August 5
A hmun: Lee Valley Hockey Centre, London
Teal tel zat : 16
Pool A: China, Italy, Korea, Netherlands
Pool B: England, India, Ireland, USA
Pool C: Argentina, Germany, South Africa, Spain
Pool D: Australia, Belgium, Japan, New Zealand
India Results & Fixtures
Pool B Match
July 21, Inrinni
India 1–1 England
IND : Neha Goyal 25'
ENG : 54'
July 26, Ningani
India 0–1 Ireland
July 29, Pathianni
India 1–1 USA
USA : Marguax Paolina 11'
IND : Rani Rampal 31'
Playoff
India 3–0 Italy
IND : Lalremsiami Hmar 9'; Neha Goyal 45'; Vandana Katariya 55'
Quarterfinal Fixtures
1 August, Nilaini
Germany 10.30 PM Spain
Australia 12.35 AM Argentina
2 August, Ningani
Ireland 10.30 PM India
Netherlands 12.35 AM England
World Cup-ah Mizo Goal
India tan goal hmahruai a khung a, khelmual chhunga player hmuhnawm leh che ṭha bik a nih avangin Lalremsiami Hmar chu Italy nen Women's Hockey World Cup 2018 playoff an khelh ṭum hian 'Player of the Match' atan thlan a ni.
Mizo zinga World Cup khel hmasa ber Kolasib College Veng nula Siami chuan, "Ka duhthusam ṭhin a ni a, a thleng dik ta mai hi mumang ang mai a ni. Riruah 'Ka Lawm e Lalpa' tih a rawn lang hmasa ber a, ring takin ka au chhuah pui," tiin a goal khung chungchang Vanglaini a hrilh a, an inkhelh leh turah ṭawngṭai pui turin Mizo mipui a sawm bawk.
India player zinga naupang ber Siami (18) hian Italy an hmachhawn hma khan an huphurh bik loh thu leh, an game pangngai an khel thei a nih chuan hnehna an chan a rin thu a lo sawi tawh a, a sawi ang ngeiin khawvel hmuhah Mizo hnam a chawimawi.
Nun kawng innghah nana Bible chang, "I awm dan tur chu Lalpa chungah nghat la; Amah chu ring la, Aman a ti vek ang" (Sam 37) tih hmangtu Siami hi Commonwealth Games-ah khan player naupang ber a lo ni tawh bawk.
Thenzawl Hockey Training Center aṭanga inzir chhuak Siami hi tun inelna lianah hian match hmasa berah inkhel bul ṭan lo mah se, a hnuhnung pathumah erawh a tir aṭangin a khel vek–an khelh hmabakah pawh India mipui mit fukna a ni chhunzawm ang.
