Everton-in Lucas Digne an lalut!

Premier League club Ever­ton-in season tharah 'tih mai mai' an tum lo tih an player lakluh hmangin an pholan chhunzawm zel - Lucas Digne chu Barcelona aṭangin pound maktaduai 18-in an lalut.

Kum 25 mi left back hian Goodison Park-ah kum nga chhung khel turin contract a ziak a, Marco Silva enkawlna hnuaiah Everton-in sang tak thlen an tum tih an pholang - Digne hma hian pound maktaduai 50 man Richarlison an lalut tawh bawk.

France tana vawi 21 inlan tawh defender chuan, "Everton hi club lian tak, sulhnu pawh nei ṭha an ni. Match tam zawk khelh a, hnehna chana, foot­ball hmuhnawm tak hmanga fan-te hlimna thlentu nih ka duh a ni," tiin a sawi.

Tawnhriat nei ṭha

Kum 25 mi defender hi French club Lille youth system chhuak a ni a, France rawlthar beiseiawm pawla sawi a ni ṭhin - FIFA Under 20 World Cup 2013 champion zingah khan a tel.

2011-13 chhung Lille tana a khelh hnuah French club ṭha Paris Saint-Germain a zawm a, beisei ang erawhin hmun a chang tam lo. 2015-16 season khan Roma-ah loan-a kaltir a ni a, Italian club-ah hian season duhawm tak a hman avangin Barca chuan pound maktaduai 17 bawr vel thlenga a man sang chho thei turin an lalut.

Digne hian Barca-ah erawh beisei angin hmun a chan tam chhunzawm lo a, season hnih a cham chhungin match 46 chiah a khel a, France World Cup squad-a a tel phak loh chhanah ngaih a ni.

Hello Premier League

Digne chuan Everton a zawm chhan chu Premier League-a khelh a chak vang a nih thu a sawi. World Cup khelh zawh taka France squad-a 'standby'-a dah defender chuan, "Ka theihna tak tak pholan a, khawvela league

ṭha ber hmelhriat hi ka duh a ni.

"Mi zawng zawngin Premier League hi chu an ngaihven a, he hmuna ka lokal thei hi ka lawm hle. Engmah hlauhthawnna ka nei lo a, ka phur em em zawk a ni. Ka tan chuan ram, league, mipui leh club ropui tak Everton hmelhriatna ṭha tak a ni a, thil ropui bik a ni," a ti.

Digne hian PSG tan a khelh laiin league nomawi vawi hnih a chawi a, French Cup, League Cup leh French Super Cup-ah te a champion vek. Season hman zawh takah khan Barcelona chu league-ah a champion pui a, Spanish Cup (2) leh Spanish Super Cup (1) nomawi a chawi bawk a, Euro 2016-a France-in final an luh ṭum khan squad-ah a tel bawk.