United lakah Real an tlawm Ronaldo leh Zidane awm lohna Real engtin nge?

International Champions Cup-ah nimin zing khan Manchester United leh Real Madrid an intawng a, 2-1 in United an chak.

Red Devils tan Alexis Sanchez leh Ander Herrera ten goal khat ve ve an khung a, Real tan Karim Benzema goal khung a tawk zo lo.

USA-a tour neia zin chhuak mek United-in USA-a minute 90 chhunga chak an neih vawi khatna a ni a, hei hian chiang takin Real dinhmun a hrilhfiah zui nghal.

European champion-in an coach Zinedine Zidane an chan hnu lawkah Cristiano Ronaldo an chan chhunzawm a, tun hnaia an hlawhtlin nana thawhhlawk tak pahnih tel loin Real hi engtinnge an kal zel dawn, tih chu zawhna awm a ni ta.

Hmun ruak zau

Zidane-a'n kum hnih leh a chanve Real a enkawl chhungin Europe roreltu-ah Spanish club a siam a, season thum chhungin Champions League nomawi an chawi fai vek.

Mahse, season hman zawh rual deuhthawin Zidane-a'n Real a chhuahsan thu a puang a, Real fan-te mittui tla pawh a hul fel hmain an player ropui Cristiano Ronaldo-a'n Santiago Bernabeu a chhuahsan thu a puang ve lehnghal.

Real fan-te an hawihai a, an ropuina thamral ṭan mek an hmu niin an inngai. Zidane hmun ruak luah tura manager ṭha tawk tu nge awm ang a, match 438 leka goal 451 khung thei Ronaldo pheikhawk hnutchhiaha inthawlh thei player ṭha tu nge awm ang?

Spanish club president Florentino Pérez-a'n Spain coach Julen Lopetegui 'ah' Zidane hmun ruak luah tur 'chhanna' hmu niin a inngai a, Lopetegui-a'n Ronaldo hmun ruak chu Gareth Bale-a'n a luah tur thu a sawi ve bawk.

Mahse maw...

Julen Lopetegui enkawlna hnuaiah Real-in an match hmasa ber khelin United an hmachhawn nghal a, a result chu 'chak loh' a ni–pre season friendly match mai mah ni se US tour hmang chhe tak United ngam loh hi mualphona a ni.

Lopetegui-a'n Ronaldo thlaktu tur a tih Gareth Bale chu tlarhmaah Karim Benzema leh pound maktaduai 38.7-a lakluh Vinicius Junior nen inkawp tir an ni a, Bale hian vawi khat hun ṭha a nei tih loh chu minute 45 khelmuala hun a hman chhungin hlauhawm a thlen lo.

Real a zawm avanga World Cup-a Spain team a kaihhruai phal sak ni lo Lopetegui-a'n Zidane-a hmun ruak a luah zo rih lo tih a lang a, hetihrual hian tun hi thutlukna siam hun a la ni lo–Spain team-a khawvel player langsar ber ber lo kaihruai tawhtu a ni tih hi theihnghilh sak loh a ṭha.

Spanish club tana chanchin lawmawm ber nia lang chu Vinicius kha a ni. Brazilian rawlthar duhawm hian a tlan chakna leh ball thiamna United lakah a pholang a, kum 18 mi forward hian hma a sawn zel a nih chuan 'Ronaldo thar' tiin an ko lo ang tih tu nge sawi thei?

Hmanhmawh suh u!

United an hneh loh miau avangin Zidane leh Ronaldo hming a ri ring nawn thar leh a, Real hma hun hi thim riauah ṭhenkhat chuan an ngai. Mahse, Miami khawpuia Real hnehtu Jose Mourinho ngaihdan erawh a dang thung.

Real boss hlui Mourinho chuan, "Ronaldo hi eng ang taka ṭha nge a nih, tih chu mi zawng zawngin an hria. Ani ang player chan chuan team chhungah pawh a lang chhuak tur a ni. Mahse, Real hi player aiin an lian zawk a, an insiamṭha vat ang," a ti a, a club hlui a ringtawk.

Mourinho chuan Real coach thar chungchang sawi nghalin, "Julen hi kum 21 liam taa kan intawn aṭang khan ka hre daih tawh a, mi ṭha tak leh coach ṭha tak a ni a, ka duhsakna ka hlan a ni," a ti.

Hetihlai hian United-in chanchinthar an nei a, Manchester khaw club chhuahsan tur anga an sawi Anthony Martial-a'n squad a la zawm lo. French forward hi a nupuiin nau a neih avangin chawlh pek a ni a, beisei huna a kir loh avangin Mourinho hian a sawisel tawh. Pathianniah United hian Bayern Munich an hmachhawn dawn a, Martial a tel dawn leh dawn loh chungchanga zawhna chu, "Ka hre lo," tiin Mourinho-a'n a chhang.

Player Inlan

Man Utd: De Gea; Darmian, Bailly, Fosu-Mensah, Shaw; Herrera, Fred (Tuanzebe 68), McTominay (Mitchell 79); Mata (Garner 82), Alexis, A Pereira.

Real Madrid: Casilla (Lunin 46); Odriozola (Sergio Lopez 62), Vallejo (Nacho 77), Sanchez, Hernandez (Reguilón 46); Llorente (Asensio 77), Valverde (Isco 77); Bale (Odegaard 46, Kroos 77), Ceballos (Raul de Thomas 62), Vinicius Junior (Oscar Rodriguez 62); Benzema (Mayoral 46).