Srikanth leh Sindhu an tlang

Badminton World Champion­ships 2018 khelh laiah India tlangval Kidambi Srikanth-a'n a match hmasa berah hnehna a chang a, Srikanth ang bawkah first round-a bye PV Sindhu chuan nimin tlai khan Fitriani Fitrani chu 21-14, 21-9 a hnehin hmeichhe singles third round a inhlangkai ve bawk.

Srikanth a ṭha

Thawhlehni zan inkhelah Kidambi Srikanth chuan Pablo Abian lakah fiahna tenau a hmachhawn nghal a, Indian shuttler hian darkar khat leh minute hnih chhungin 21-15, 12-21, 21-14 in hnehna a chang.

Seeded pangana Srikanth-a'n harsa lutuk loin set hmasa ber a la mai, set hnihnaah erawh 6-3 in hma hruai nghal mah se, Spanish shuttler hian set la turin a zawnin point ruk ngawt a hmu zawn thei - set hnuhnung berah an inkhel tawk a, hun pawimawhah Srikanth hian a tawnhriat neih ṭhat hmang ṭangkaiin hnehna a chang ta zawk a ni.

Season hmasa khan Srikanth hian nomawi lian tham pali ngawt a chawi a, mahse World Cham­pionship-ah erawh quarter­final a paltlang lo. Kuminah hlawhtlin tumin thapui a thawh a, a match lehpekah chuan Misha Zilberman hnehtu Liew Daren nen an intawng leh ang.

Nimin inkhel dangah India tlangval dang HS Prannoy erawh a zinkawng a tawp. Prannoy hi Brazil tlangval Ygor Coelho nen set thum an inkhelh hnuah 21-8, 16-21, 15-21 in a chak lo.

Nimin Inkhel Results Langsar
Women's Singles
Nozomi Okuhara beat Rachel Honderich 21-11, 21-9
Chen Yufei beat Gregoria Mariska Tunjung 21-17, 22-20
Men's Singles
Viktor Axelsen beat Yuxiang Huang 21-17, 21-8
Chen Long beat Khosit Phetpradab 21-16, 21-11
Kento Momota beat Luka Wraber 21-8, 21-10