Semifinal-ah Ramhlun North nge Electric Veng?

LG Independence Cup a ngaihnawm ṭan ta. Thawhlehni zan khan Ramhlun North-in an vawi khat inlannaah Bethlehem Vengthlang FC an hneh a, vawiin chawhnu dar 2:00 hian mumang rama cheng mek Electric Veng FC an hmachhawn dawn.

MPL kaithar Electric Veng hian MPL-a vawi hnih champion thei pahnih Aizawl FC leh Chanmari FC te an hmachhawn tawh nachungin point li an hlawh chhuak a, chak loh an la nei lo. Ramhlun North hian hliam an nei lo a nih chuan champion thei tur khawpin an ṭha a, Electric Veng aiin an ṭha zawk tihna a ni.

Point thum hlu

Ramhlun North leh Bethlehem Vengthlang te an inhnehtawk a, inkhelh ṭantirh lamah BVT tan Laldinliana Varte a che ṭha a, Lalhlima freekick a hlauhawm bawk.

Amaherawhchu minute 39-naah BVT defender tihṭhat tawk loh avangin Ramhlun North forward Lalliansanga'n (Notea) chak taka ball a lakluh hnuah cross ball chu Vanlallawma'n goal-ah a chantir.

Second half-ah pawh Ramhlun North bawkin goal an khung hmasa a, minute 64-naah freekick aṭanga a ball hmuh chu Lalnunmawia'n a khung a, BVT keeper Ramhmasuon Songate a inrawlh hman lo.

BVT tan defender ṭha Lalhlima'n freekick aṭangin minute 71-naah goal a khung a, beiseina thar neih phah mah se goal dang an khung tawh lo. BVT-in anni aia player nei ṭha zawk Ramhlun North an el tawk a, amaherawhchu an phu ang result an hlawh chhuak lo.

Bethlehem VT coach Benjamin Lalhriatpuia chuan, "Ramhlun North goal hnih kha kan tihsual vanga lut chu ka ti lo a, hun pawimawha kan tihtur kan tih loh avanga lutah ka ngai thung. Match hnihah point kan hmu lo a, chutihrualin beiseina tlem kan la nei, semifinal kan luh theih chhung chu kan theihna zawng zawng kan chhuah ang," tiin a sawi.

Quarterfinal chu?

Electric Vengin group A aṭanga semifinal lut tura beisei Aizawl FC an hneh a, Chanmari FC an draw leh bawk avangin Ramhlun North nena an inkhel tur hi quarterfinal ang hiala sawi theih a ni. Amaherawhchu inkhel pawimawh takah hian match hnuhnung bera man of the match C. Laldinmawia chu hrem vangin Electric Vengin an chhawr thei dawn lo.

MPL kaithar hian tawnhriat nei ṭha Dinmawia thlakna turin Khelo India-a Mizoram champion puitu Zohmingmawia te an kawl a, Vanlremkima (Tetea) mawhphurna erawh a sang sawt ang. Electric Veng phur vanglai tak a ni a, team

ṭha zawka ngaih Ramhlun North tan pawh a harsa ang.

Electric Veng manager Lalchhanhima chuan, "MPL team zinga tawnhriat nei tlem ber ni mah ila kan player-te tumruhna leh inlungrualna, veng mipui min ṭawiawmna leh kan ṭawngṭai tamna avanga tun dinhmun thleng thei kan ni. Ramhlun North nen pawh 100% pein kan theihna zawng zawng nen kan khel ang," tiin Vanglaini a hrilh.

Ramhlun North manager

K. Lalenghluna (Maenga) chuan, "Electric Veng inkhel hi ka la en ve ve a, khelh an châkawm ta lo khawp mai. BVT nen pawh player nen chuan ṭha zawk ni mah ila kan inhnehtawk hle. Chuvangin kan fimkhur a ṭul ang," tiin Vanglaini a hrilh.

Champion tumin Ramhlun North hian starting eleven-ah tualchhung player ṭha rual an chhawr thei a, amaherawhchu Electric Veng FC zawhah Aizawl FC leh Chanmari FC an la hmachhawn dawn avangin semifinal kalkawng a harsa dawn.