Serena hnehtu Konta

World number 1 hlui Serena Williams chuan fa a neih hnuah a duh ang takin tennis racket a la hum fuh thei tawk lo niin a lang, Wimbledon final-a a chak loh hnua a match hmasa berah Johanna Konta hneh loin WTA San Jose tournament aṭanga vuak tlak a ni.

Thawhlehni zan inkhelah British number 1 Konta hian minute 51 chhung lekin 6-1, 6-0 in Grand Slam vawi 23 champion tawh hi a sawp. Seeded parukna Serena hian winners vawi kua chiah a vaw chhuak a, unforced errors vawi 25 neiin a service chu ṭum ruk chhuhsak a ni bawk.

Tennis a khelh hun chhunga singles title 72 zet vaw chhuak tawhtu Serena hi Konta lakah a che thei lo hle, 1995 aṭanga professional match a khelh hnuah game hnih pawh la tling loa a tlawmna hmasa ber a ni.

Kum 36 mi Serena chuan, "Set hmasa kan chetsual hnu kha chuan insiamṭhat pawh ka tum nasa hle. Mahse, ka khingpui kha a khel ṭha zual sauh a, inrintawkna a ngah tawh em bawk avangin ka tan a harsa tawh a ni," tiin a sawi.

Hnehna changtu Konta hian a match lehpekah chuan Sofia Kenin a hmachhawn leh ang, inkhel dangah Heather Watson pawhin Claire Liu lakah 6-4, 3-6, 6-4 in hnehna a chang ve bawk.