Zaninah Aizawl FC vs Chanmari FC ; Thih leh dam a ni ta - Aizawl FC coach

Season hmasa I League coach of the year Gift Raikhan chuan zanina a team inkhel tur chu 'thih leh dam inkar' a nih thu a sawi.

LG Independence Cup group stage-ah Chanmari FC leh Aizawl FC inkhel tur hi sulhnu bakah player an neih ṭhat avangin a hmuhnawm ngei tura ngaih a ni. Zanin dar 7:00 hian Mizo club lian pahnih hi Lammualah an inhmachhawn dawn.

CFC leh AFC hi hman ni khan MFA Super Cup semifinal-ah intumin minute 90 chhungin 2-2 in an inhnehtawk a, extra time-ah Chanmari dingchangin 4-3 in an chak.

Inkhel pawimawh

Aizawl FC-in an match hmasa berah Electric Veng FC an hneh lo a, Chanmari FC-in MPL club thar lakah point khat chauh an hlawh chhuak ve bawk.

I League club-in point an la hmuh loh avangin Chanmari FC an hneh a ṭul a, Lalruatliana Sailo (Tawia) hote tan inthlahdah ngam a la ni lo bawk.

Chanmari coach Tawia chuan, "MFA Super Cup-ah Aizawl FC hneh mah ila kan chungnunna bik a awm lo. Inkhel pawimawh a ni a, fimkhur tak chungin point thum hlawhchhuah kan tum ang," tiin Vanglaini a hrilh.

2013 I Day Football champion Chanmari hian Electric Veng nena chhawr loh Lalrosanga an hman a rinawm. Lunglei tlangval hian tlarhnung a rawn tih phui sawt ang.

Thih leh dam

Aizawl FC coach Gift Raikhan chuan, "Kan tan chuan thih leh dam inkar a ni tawh a, kan theihna zawng zawng nen kan khel ang. Chanmari hi team ṭha tak an ni tih kan hria a, kan intawn hmasak ṭum khan Lalrinchhana Tochhawng a khel thei lo a, tunah chuan a khel thei tawh dawn. Kan tihsualna ngaiah tihsual nawn kan tum lo a, chak ngei kan tum," tiin Vanglaini a hrilh.

I League club hian kum 2012

aṭang khan I Day Football final hi vawi li an lut tawh a, 2015 leh 2016 khan an champion. Aizawl FC hi Neroca coach hlui Gift-a hnuaiah beisei an la pha lo nachungin team ṭha zingah erawh an la tel reng.