ZPM & Congress Coordination Committee hruaitute chuan March 30, Inrinni khan Aizawl Press Club-ah thuthar thehdarhtute an kâwm a; MP inthlan lo awm turah hian India rama sakhaw zalenna duhtu leh duh lotu buk a ni dawn a, Mizo mipuite chu sakhaw zalenna duhtu lama vote turin an sawm.
ZPM & Congress Co-ordination Committee chairman K Sapdanga chuan, MP inthlan huna thu inchuh tur hi MNF hotute pawhin an hre chiang a, NDA leh NEDA aṭanga inlâk hran a, zalen taka mahni sakhua humhalh ve theih an châk hle tih sawiin, "Hnam rilru (nationalism) chawk thoa tung dingtu, Mizo hnam tana zalenna sualtu, 'Pathian leh kan ram tan' tia Kristian thinlung dik tak vuantu an nihte hi kan hriatpui a, tun hun pawimawh bik, politics hmanga sakhaw indonain a vàwrtàwp a thlen laia an rilru ang lo zawnga inlantir a ngai hi a rûk chuan hrehawm an ti hle niin kan hria a, kan lainat em em a ni" a ti a; MLA inthlan liamtaah khan anmahni phuar tlat thei leiba engemaw an neih vanga zalen lo nia a hriat thu a sawi bawk.
Sapdanga chuan, BJP chu RSS political wing an nih thu sawiin, "An thupui chu tharum hmanga Kristiante kutthlak a, India rama awm hrehawm tihtir a ni a, Narendra Modi hruai BJP sorkar din chhungin India ramah Kristian-te chunga kutthlak vawi 1200 lai a awm tawh tih Christianity Today chuan a tarlang a ni," a ti a, "Kristiante'n ram dang aṭanga ṭanpuina an dawn tihtawpsakin Vellore Hospital te, Ludhyana Christian hospital-te harsatna an siamsak a, Kristian enkawl institution, ramdang atanga rawngbawlna dawng ṭhin, tun hnaia BJP-in an tihtawpsak hi 11000 lai a tling a. Tharum hmanga nek ral chi an ni lo tih hriain, India danpui siamṭha thama tam Lok Sabha-ah tlin a, Danpuia sakhaw zalenna paih chu kawng awmchhun niin an hre ta a ni," a ti.
Congress leh ZPM chu tualchhung politics-ah chuan policy inang lo, rorel tum dan inpersan tak, hmasawnna hna ngaih pawimawh lai pawh inang lo, thawh tum dan pawh inang lo, party kaihhruai dan phei chu hrang daih an nih thu sawiin K.Sapdanga chuan, Congress leh ZPM-in candidate an inṭawm theih chhan chu "India ram lo hi ram dang kan nei rih lo a, chu kan ramah chuan, kan sakhua Kristianna chu dan hmanga nêk ral a, sakhaw lian zawk Hindu sakhua inzui luihtir tura danpui her rem tumna a awm a, hnam tênaute chu nêk ral a, hnam lian ber Hindu hnam innih luihtir theina tura danpui tihdanglam tumna a awm bawk a, lungmuang taka Kristian ni duh, lungmuang taka Mizo nih duh zawng zawngte chuan central-ah BJP tlin loh dan ngaihtuah hi kan tih makmawh a ni a, candidate kan inṭawm chhan pawh a ni," a ti.
ZPM Leader chuan, Congress nen an thlâwp MP candidate Lalnghinglova Hmar chu ṭhalaite nun siam ṭhat leh eizawnna ngaihtuaha dappui lam tui a ni tih sawiin, "Ruihhloin Mizo ṭhalaite a rún nasa lutuk chu a vei hle a, chhanchhuahna hmanrua atan football a ṭha ber ang tih ringin, football hmangin ṭhalaite kaitho a, ruihhlo laka chhan turin a inbuatsaih a ni. A chángin Mizo mipui kawr sen min hâktir a, a chángin khelmual ṭha ngenin min au rualtir a ni," a ti a; amah avanga football leh a kaihhnawiha sum thawh chhuahna remchang hmu hi Mizo thalai an tam em em a, ṭhalai nun chher nan football a hmang ṭangkai thiam ang thoin MP nihna pawh ram tan a hmang ṭangkai thiam ang tih beiseiin candidate atan sawm chhuah a ni tih a sawi bawk.
