Inthlan kaihhnawihah pawisa la man lo

Lok Sabha inthlanpui atana Flying Squad leh Static Surveillance team hotu John Neihlaia, IGP chuan, inthlan kaihhnawihah pawisa man an la neih loh thu a sawi a, "Ruihhlo chu eng emaw zat kan man tawh," a ti.

Vanglaini palai zawhna chhangin John Neihlaia chuan, Election Commission of India (ECI)-in a phal loh thilte vâiin district tinah duty an awm reng thu a sawi a, "ECI-in a phal chin bak pawisa kawl mansak kan la nei lo," a ti a; ngawrh takin hmun hrang hrangah an duty chhunzawm zel tur thu a sawi.

IGP sawi danin, Flying Squad leh Static Surveillance team-te hian Lok Sabha inthlanpui kaihhnawihah rakzu litre 6,009 leh fûn eng emaw zat, zu bilh lai litre 1,130, sap zu ûm 74, ganja Rs. 72,000 hû leh heroin Rs. 40,000 hû an man tawh a ni.