Mizoram sorkara ruling MP aiin, Central-a Ruling MP neih a pawimawh zawk - Tetea Hmar

Lok Sabha inthlan tura MPCC leh ZPM thlàwp mipui candidate Lalnghinglova Hmar chuan March 30, Inrinni khan Aizawl khawpui­ah street campaign a nei a; hmun pali-ah thu sawiin, Lok Sabha MP thlan turah Mizoram sorkara ruling MP aiin, Central sorkara ruling MP neih a pawimawh zawk thu sawiin, amah vote turin mi zawng zawng a sáwm.

Lalnghinglova Hmar hian Inrinni khan nilengin street campaign a nei a, ITI Veng, Mission Veng Bazar, New Market leh Bawngkawnahte thu a sawi a; zanah ZONET Cable TV-ah live-in kawm a ni leh bawk. Street campaign a neihnaah Lalnghinglova chuan, Lok Sabha inthlan leh Mizoram Assembly inthlan a danglam tih sawiin, "Mizoramah chuan kum nga chhung sorkar tur kan thlang zo deuh chauh a, MNF an tling a, tluang takin, ṭha takin ram tana hna thawk turin ka duhsak em em a ni," a ti a; tuna inthlan tur erawh chu Lok Sabha MP tur a nih avangin thu khel a dang tawh a, NDA (BJP) lamṭang leh lamṭang lote inbeihna a nih thu a sawi.

Lalnghinglova Hmar chuan, MNF-in an thawhpui BJP leh NDA sorkar chu kum nga chhung­in an che ṭha lo hle, tun ṭum inthlanah chuan an tlak tawh ngei rin a nih thu leh, BJP chu India ram Hindu lal ram din tumtu an nih avangin an tlâk theih nan ṭan an lâk thu a sawi a, "Mizoramin Lok Sabha MP pakhat kan neih thar tur hi Mizoram state sorkarin a thawhpui theih tur aiin, Central sorkarin ṭha taka a thawhpui theih tur a pawimawh zawk. BJP/NDA an sorkar loh a, MNF MP kan neih si chuan opposition MP kan nei dawn tihna a ni," a ti.

NDA-BJP kum nga an sorkar chhungin Muslim leh Kristiante zalenna a hniam sawt hle tih sawiin Tetea Hmar chuan, "Kristian missionary-te'n harsatna nasa tak an tâwk a, kawng tam takah NDA sorkar hi a che ṭha lo hle. NDA-BJP sorkar hi thlak a ngai tawh a ni," a ti a, BJP/NDA lo lama ṭang turin an intél khawm tih a sawi.

Lalnghinglova chuan, MP candidate zingah a fel ber bik lo ang tih a rin thu a sawi rualin, "Ka fûkna zár lam hi a fuh a, sakhaw zalenna duhtu lamah kan awm dawn a, India rama Hindu lal ram din tumtu NDA lamah kan tel ve dawn lo. BJP leh an thawhpuirte an sorkar leh hi kan ram, kan hnam, kan sakhaw tan a him lo thei. 'CAB kan kalpui leh dawn,' ti lui leh ngattu NDA/BJP leh an thurualpuite hi Mizo Kristian tan vote a him lo a ni," a ti.

Lalnghinglova Hmar chuan, MP-a thlan tlin a niha a thawh tur hrang hrang a sawi a; kut hnathawktute tana hamṭhatna leh an inzirna tur ngaihtuah a tum thu te, ṭhalaite tan skill development, sport, music, art leh entertainment lama tihhmasawn dan kawng zawn a tum thute leh a ngaih pawimawh chi hrang hrang a sawi lang a ni.