KHAWTHLIR

Thisen pe
Inrinni khan Durtlang Bial KṬP chuan Synod Hospital tan thisen unit 44 an pe a, a petute mipa 32 leh hmeichhia 12 an ni. Aibawk Branch YMA-in MIMER-ah thisen unit 38 pe in, a petute mipa 35 leh hmeichhia pathum an ni a; Aizawl Civil Hospital-ah Kawlkulh Students Union, Aizawlin thisen unit 16 leh V.Thanga Road, Dawrpui-in unit 12 an pe. Adventist Youth Federation, Lunglei bialte'n Lunglei Civil Hospital-ah unit 27 pein, a petute mipa 19 leh hmeichhia pariat an ni a; Champhaia Chhura Hmun Welfare-te'n Champhai District Hospital-ah unit 13 an pe bawk.

Paper present
Aizawl West College-a assistant professor Dr Laldinpuii chuan March 30, Inrinni khan Tokyo, Japan-a 10th. Asian Conference on Arts & Humanities (ACH 2019)-ah paper a present a, a paper thupui thu 'Re-reading Mizo Folktales' tih a ni. Conference hi The International Academic Forum buatsaih a ni. 

CYMA-in sawiho
YMA Central Executive Committee (CEC) meeting, Inrinni chhuna CYMA Committee Room-a neih chuan, Tripura transit camp-a Bru-te'n Lok Sabha inthlanpuia Mizoram chhunga vote an neihna polling station-a vote thlak lo a, Kanhmuna special polling station siamsak an nih chungchanga hmalak dan tur an ngaihtuah a; vawiina YMA sub-headquarters hruaitute leh CYMA-in a awm YMA group hruaitute nen sawiho leh turin an dah.

CYMA-ah hlan
Ludhiana, Punjab-a hmunpui nei International Marketing Corporation Pvt. Ltd. chuan March 30, Inrinni chhûn khan a ṭulna a pianga hman turin Central YMA hnenah puan lum (blanket) 100 an hlan. Thilpek hlanna hi CYMA Commitee Room-ah neih a ni a, IMC chairman Ronguri'n CYMA president Vanlalruata kutah a hlan a ni.

Complaint theih
State Guest House, Aizawl­ah eng lai pawha biakpawh theih tur income tax control room (24x7) hawn thar a ni a; inthlan campaign lai leh inthlan zawh hmaa sum hlawm lian che vel chungchangah complaint duh nei tan toll free no. 0389-2342358 leh 1800-3453546 ah thlen theih a ni.