A tàwp thlengin CAB do ka tum - Lalrosanga

Lok Sabha inthlan tura MNF party candidate C Lalrosanga chuan March 30, Inrinni khan Mizoram chhim lam a fang a; Citizenship Amendment Bill (CAB) chu Mizo ram leh hnam tana him lo a nih avangin a tawp thleng­a do a tum thu a sawi.

C Lalrosanga chuan Inrinni aṭang khan chhim lam tlangdung a fang ṭan a, Thenzawl, Haulawng leh Lungleiahte steet campaign a neih bakah, Lungleiah thuthar thehdarhtute a kâwm a ni. C Lalrosanga chuan Lungleia van­tlang inkhawmah thu sawiin, thlan tlin a nih chuan ram hmasawnna tura a tih turte a hre nghal niin a sawi a; CAB chungchangah, "Kan ram leh hnam tana him lo CAB hi a tàwp rak thlengin ka do ang a, martarpui a ngaih pawhin ka martarpui mai ang. Zo hnahthlak zawng zawngte tana ding tur ka ni," a ti.

MLA inthlan hnuhnung berah Pathian­in sorkar thar ṭha tak a pe tih sawiin Lalrosangachuan, "Chief Minister, minister leh MLA thar ṭha tak min pe a, ni 100 vel lek chhunga sorkarin hna a thawh enin, a phûrawma, beiseina sang tak nen mipui pawhin a thlir reng a ni," a ti a; kum nga chhungin Mizoram chu a kâng dâwrh dawn nia a lan thu a sawi.

MNF Candidate chuan, sorkar hmalakna a hlawhtlin a, mi tinin an chhawr theih nan MP atan MNF candidate thlan tlin a ṭul nia sawiin, "Mizoram tihhmasawnna tur hrang hrangte ûm zui a, hai chhuaha sorkar thâ tichak turin Mizoram sorkar aiawh MP a awm a ṭul. State danga hmasawnna ruhrel changtlung tak hmuhin rualawhna a sang hle a ni," a ti.

Mizoram chhim lamin an mamawh leh hasrsatna an thlente chu MP mawhphurhna aṭanga tih theih ang reng reng kut kuangkuahsan mai loa hmalak a tum thu a sawi sawiin C Lalrosanga chuan, "Changkannain a ken tel leh kan mamawh em em communication system pathum - road connectivity, air connectivity leh internet & broadcasting lamah kan dinhmun a chhia a, hma kan sawn theihna atan theihtawp chhuah ka tum," a ti bawk.

MNF vice president Dr R Lalthang­liana pawhin thu sawiin, "Pu C Lalrosanga hi kan sakhua leh Kristianna vawnghim tur te, Delhi tlanga Mizoram mamawh sawi chhuak tur chuan ani aia ṭha an awm lo a, party thliar loin lo vote ang che u. Inthlang sual lo ang, sorkar chakna thahrui tur a ni," a ti.

Dr R Lalthangliana chuan, C Lalrosanga chu Doordarshan-a post sang ber director general ni thei a nih thu sawiin, "Parliament House-ah vawiduailo kalin MP hrang hrang nen an indawr ṭhin. Department hotu a nihnaa department kaihhhnawih zawhna tam tak chhan tur pawh a lo buatsaih tawh ṭhin a ni," a ti a; Wake-up ministry-a chairman a nih thu a sawi.

MNF Vice President chuan, MNF party-in ni 105 an sorkar tawh chhungin malsawmna an dawng tih sawiin, "A chhan chu sorkar lak luh ṭuma Pathian kan ràwn vang leh chief minister Pu Zoramthanga hi ni tin Pathian hnena a inhlan vang a ni. Pathian kan ráwn zel ang a, hma lam panin hmasawnna nasa tak kan hmu zel ang. Rei lo tê kan sorkar chhung hian kan hmachhawp tam tak kan tipuitling tawh," a ti.