Sorkarin MSSSB a la din lo Rules buaipui mek a ni - DPAR

Mizoram sorkar chuan group B (non-gazetted) hna lak hna thawktu tur, Mizoram Subordinate Services Selection Board (MSSSB) a la din lo. Department of Personnel and Administrative Reforms (DPAR) hotute chuan MSSSB atan hian a rules buaipui mek a nih thu an sawi.

Vanglaini palai zawhna chhangin DPAR hotute chuan, MSSSB din fel a la nih loh thu hi an sawi a, "Rules buaipui mek a ni a, Finance leh Law & Judicial dept. lamah tihfel ngai neuh neuhte a la awm. Rules hi peihfel a nih hnuah MSSSB hi din fel theih a ni ang," an ti.

DPAR hotute sawi danin, rules hmang hian MSSSB chairman leh member turte ruat tur a ni a, an dinhmun turte pawh rules-ah hian duan vek a ni ang.  Rules peihfel a la nih loh avang hian chairman leh member tur ruat an la ni loa, chairman leh member bakah post dang siamte pawh a ngai dawn a ni.

Tarlan tawh ṭhin angin June 10, 2019-a council of minister 

ṭhu­khawm chuan Mizoram Public Service Commission (MPSC)-in Mizoram sorkara thawk tur lakna a khawih ṭhin zinga group B (non-gazetted) chin chu MPSC hnen aṭanga laksak a,  group-B (non-gazetted) chin hnuai lam hna thawk tur lakna buaipui tura MSSSB din an rel a ni.

Sorkar thuchhuah tarlan dan chuan MPSC kaltlanga hna lak tam lutuk chhâwk zângkhaina atan leh an hna lak leh thawh turte a hun tak zela an lak theih­­na atan group-B (non-gazetted) recruitment chu MPSC mawhphurhna aṭanga lak chhuah Cabinet chuan an rel a ni.

Cabinet thutlukna avang hian MPSC chuan July 22, 2019 

aṭang khan group B (non gazetted) post lak hna an buaipui tur leh buaipui laklawhte pawh khawih chhunzawm lo turin thutlukna an siam. 

MPSC chairman Rev. Zo­sang­liana Colney chuan sorkar thu an zah avanga thutlukna hi siam an nih thu a sawi a, "Keini tan chuan lo khawi luih zel chu sorkar thupek pawisak lohnate pawh a ni thei. Order kan hmuh reng laia hna lo lak chhunzawm zel chu a inthlahrunawm a ni," a ti.

Hetihlai hian MZP hruaitute chuan June 23, 2019 khan MPSC thutlukna chungchangah hian chief minister Zoramthanga an kawm a, Chief Minister chuan MPSC-in  group B (non gazetted) post lak hna a buaipui laklawhte chu MPSC-in an khawih chhun­zawm tur thu a lo hrilh leh ta a ni.



Share this Post

Login to comment
No Comments