United Nations Security Council (UNSC) meeting-a Pakistan ram aiawhin Jammu & Kashmir chungchang a sawi dan chu India chuan sawiselin a hnawl a, J&K chungchang chu India ram chhung thil a nih thu leh ram dang lo inrawlhna tur a awm loh thu a sawi.
Ningani khan New York-a UN headquarters-ah China leh Pakistan buatsaihin 'Arria-formula meeting', Security Council meeting pangngai ni chiah lo neih a ni. Hun hmanah hian Pakistan ambassador Asim Iftikhar Ahmad chuan Kashmir chungchang hi a sawi chhuak a ni.
Pakistan-in ram chhung thil a rawn sawichhuah sak ṭhin chu UN-a India Permanent Representative, ambassador Parvathaneni Harish chuan chhang letin, Pakistan thiltih chu elsenna a ni a ti a, khawvel nghawng thupui lian ngaihtuahna hmun chu politics khelhna hmunah an hmang a ni, a ti. Harish chuan "Pakistan aiawhin he hmuna thupui pangngai piah lam thil a sawi kai hi, co-chair zinga mi rorelna tluang leh bitum bik nei lo tura beisei a nih laia tualchhung thil ama mimal leh ram political hlawkna atana a hmang mai hi a mak hle a ni," a ti.
Kashmir leh Ladakh bial chungchanga India dinhmun chu a ngai reng a, he thil hi tualchhung buaina leh India ram peng pakhat a nih avangin khawvel ram dang emaw, third-party mediation lo inrawlh emaw, rorelna rawn siamsak tumna reng reng chu India sorkar chuan an pawm ngai loh thu an tarlang. Term kal mekah Pakistan hi kum hnih chhung atan UNSC-ah non-permanent member-ah an thlang a ni.
