India sipai hrang hrang tana sum hman tur ruangam siam, Defence Procurement Mannual (DPM) 2025 thar chu Pathianni khan defence minister Rajnath Singh-a'n a pawmpui hnuah khuh hawn a ni. DPM thar hi sipai hrang hrang thuam chakna tur atana sum sen ngaite hriatthiam awlsam tura duan niin, a tum ber chu hmanraw mamawhte tihkhawtlai loha a awm theihna tur a ni.

DPM 2025 ah hian defence ministry hnuaia kalphung duanah, fiscal hman meka sum ruahman zat chu Rs vbc nuai 1 niin an tarlang. Sipai huanga service pathum Army, Air Force, leh Navy-te pumkhat zawka an kal theihna tur leh, inpeihna ṭha tak a thlen theihna tura beisei a ni bawk.

Defence ministry chuan sum hman tur ruangam siam thar hi defence ministry leh armed forces bakah stakeholder-te rawn chunga duan thar a ni a, hemi kaltlang hian defence huanga intodelhna tur, Aatmanirbharta (self-reliance) thuam chakna thlen thei tura tih a nih thu an tarlang. Ministry hnuaiah hian bungrua leh services atana sum hman tur chu ngaihtuah niin, manual tihthar hnuhnung ber hi kum 2009 khan kalpui a ni.

Hmalakna kalpui tur ennawn hian defence lam thil a sum sen ngai ṭhin chu a tihawlsam phah thei dawn a, thutlukna hmanhmawh thlak siam pawh a awlsam phah dawn bawk. Hei bakah hian hna sang leh hniama file kal chhung pawh a tihtlem bakah bungraw leinate hnenah awlsam zawka sum pek chhuah a nih theih phah dawn niin ministry chuan a tarlang bawk.