All India Congress Committee (AICC) general secretary, KC Venugopal chuan chief election commissioner (CEC) Gyanesh Kumar ban a nih a, electoral system felfai leh langtlang neihna tura hma lak a nih hma chu an party chuan lungawi lohna lantir zel an tum thu nimin khan a sawi.

Nimina chanchinthar lakhawmtute a kawmnaah, Venugopal chuan lungawi lohna lantir chu Diwali lawm laiin an chawl lawk ang a, hemi hnuah state leh district level-ah nawrh huaihawt chhunzawm a ni ang, a ti. November 1-a Congress-in New Delhi-a rally an huaihawt chu ramchhunga nawrh huaihawt lian leh thawm nei lian ber zinga mi a ni tiin, prime minister Narendra Modi leh union home ministe Amit Shah-te laka an beihpui thlakna a nih thu a sawi bawk.

"Gyanesh Kumar hi ban a nih a, India electoral system siamṭhatna tura hma lak a nih hunah chauh lungawi lohna lantir hi kan tawpsan ang. He thil hi a laklawh laia bansan leh mai chi a ni lo" tiin Venugopal chuan a sawi.

Ramchhunga electoral roll ennawn, Special Intensive Revision (SIR) kalpui meka voter list aṭanga mi tam tak paih an nih chungchang pawh sawi chhuakin, Venugopal chuan he thil vang hian mirethei tam takin vote thlak tura an dikna chanvo an neihte an hloh bakah, sorkar aṭanga hamṭhatna an dawnte pawh an chan phah dawn a ni, a ti.

Congress party hian lungawi lohna lantirna tur, 'Vote Bachao, Desh Bachao' campaign chu ram pum huapin panchayat level-ah thla khat leh a chanve chhung vel kalpui an tum a ni. Hemi atan hian party chuan polling booth tinah electoral roll enfiahtu tur, list aṭanga paihte hming enfiah a, an in lamah pawh pui tura tlawhtu tur 'Vote Rakshak ' an ruat dawn a ni. Party unit hrang hrangte chuan state leh district level-ah programme te pawh buatsaihin, political party dangte nena thawh ho dan tur pawh an ngaihtuah mek bawk.

Venugopal chuan Parliament session lo awm turah list aṭanga voter tam tak paih an nih dan hi sawichhuah ngei an tum tih sawiin, hei bakah mipui nghawng harsatna dang awmte pawh auchhuah pui an tum a ni.