Vanglaini chuan November 7, Inrinni khan Aijal Club-ah Zoram Titi vawi 13-na a buatsaih a, 'Mizoramah khualzin - A hlawkna leh invenna tur' tih thupui sawiho a ni a; sorkar kum kal mekah kum chanve chhungin khualzin 4,36,988 an rawn lut tawh tih tarlan a ni.

Kumin Zoram Titi-ah hian panelist-ah mi pakua an awm a; chungte chu - Tourism department aṭangin deputy director Rachel Lalrinhlui leh tourist officer C Ramsangzuali, Home joint secretary John Ṭanpuia, Association of Tour Operators Mizoram vice president Joe RZ Thanga, Mizoram Tour Guide Association president Lalhruaitluangi, Homestay Association of Mizoram president F Zothanzuala, Reiek Tlang Tourism Development Board secretary K Lallawmtluanga, Mark Events Management neitu Robert Rohmingliana leh MJA president Vanlalrema Vantawl te an ni. Mizoram University, Aizawl College, Hrangbana College leh ICFAI University aṭangin zirlai 14 an tel bawk.

Zoram Titia sawihonaah hian khualzin (tourist)-te hîp tura sorkar inbuatsaihna, hmalakna leh hmachhawp te, khualzinte dawnsawn dan kalpui mekte leh khualzin rawn lutte dinhmun tlangpui tarlan a ni a; ṭha zawka hmalak theih dan tur leh mipui inbuatsaih dan tur ṭha zawk nia langte leh, inven ngaihna laite sawiho a ni.

Tarlan danin, kum 2025-26 chhung khan Mizoramah state pawn aṭangin khualzin 9,80,618 an rawn lut a, chungte chu India mi 9,66,060 leh ram dang mi 14,558 an ni. Sorkar kum kal mekah April-September 2026 chhungin khualzin 4,36,988 an rawn lut a, India mi 4,29,980 leh ram dang mi 7,008 an ni.

Zoram Titia tarlan danin, Reiek Tlang chuan kumin hian tualchhung (Mizoram) mite aiin ram chhung (state dang) mi tlawhtu a ngah zawk a; kuminah state dang mi 30,000 velin Reiek Tlang an tlawh tawh a, tualchhung mi 10,000 vel leh foreigner 50 velin an tlawh tawh bawk.

Mizoramah Tourism department-a inziak lut tour guide 125, tour operator 23, travel agent 46, hotel 94, homestay 107, guesthouse/lodge/inn 61, resort 11, farmstay pathum, restaurant 1,024, catering unit 45 leh picnic spot pathum a awm. Picnic spot leh resort-te chu Tourism department-ah inziah luh ngei tur a nih thu sawi a ni.

Homestay-te chuan an awmna hmun leh an inpho chhuah thiam dan azirin mikhual an nei deuh reng a; khualzinte chu Mizo khawsak phung hre châka rawn zin an tam avangin homestay-ah an thleng nasa. Hetihlai hian, sorkarin a phal loh anga homestay kalpui an awm mek thu an sawi.

Home department aiawh tarlan danin, ILP dan thar siam a ni a; ni 30 dam tourist ILP siam thar niin, temporary ILP dam hun chu ni 7 aṭangin ni 15-ah pawhsei a ni. Thla ruk chhung dam regular ILP chu ṭum hnih pawhsei theih turin siam a ni a; phai aṭanga company hnuaia rawn thawkte pass kum hnih dam chu mumal zawkin security deposit an dah turte nen siamṭhat a ni tawh. Mi pakhatin ILP mi 10 an sponsor theih ṭhin chu mi 100-ah tihpun a ni tawh bawk.

ILP Online 3.0 chu hman theiha peih thawkhat a ni tawh a, rêl hmanga Mizorama lut tur tan online-a rel ticket book-naah ILP dil theihna tur link dah tawh a ni.

Zoram Titi vawi 13-na hi November 11, 2026 zan dar 8-ah ZONET Zawlbûk leh Youtube channel-ah tihchhuah a ni ang.