United Nations Organisation (UNO) hnuaia Food and Agriculture Organization (FAO)-in International Year of Women Farmer 2026 puala 'FAO 100 Women Heroes in Agrifood Systems and Rural Deve­lop­ment' a thlan zingah ZT Lalrithangi, Sangau, Lawngtlai district a tel.

ZT Lalrithangi hian nasa takin strawberry a ching a, a hlawhtling chho viau a; hei vang hian October 12-16, 2026 chhunga FAO hmunpui, Rome, Italy-a World Food Forum-ah award dawng tura thlan a ni a, Mizo zinga dawng hmasa ber a ni dawn.

ZT Lalrithangi hi khawvela ram 131 aṭanga award dawng tlaka ngaih mi 600 chuang zingah telin, India ram aṭangin amah bakah mi dang pakhat a tel a; award dawng turin thlan a ni zui ta a ni. Mizoram Horti Fair 2026-ah Lawngtlai Best Farmer atan thlan a lo ni tawh bawk.