Chief minister Zoramthanga chuan, Mizoram leh Assam ramri buai chu minister leh chief minister level-ah chinfel tuma hmalak a nih thu leh, harsatna awm zawng zawng chinfel vek a nih dawn thu leh, kumin August thla tàwpah emaw, September thla tìr lamah emaw Assam Chief Minister nen an inbiak dawn thu a sawi. 
CM Zoramthanga hian Mizoram leh Assam ramri chungchanga Mizoram minister-te be tura rawn zin Assam Border Development & Protection minister Atul Bora, Housing & Urban Affairs minister Ashok Singhal leh official dangte nimin zing khan CM Banglaah a kâwm a; an inkawm zawhah Assam press mite hmaah thu a sawi a ni.
Press mite zawhna chhángin Zoramthanga chuan, "Minister level aṭangin hma kan la mek a, chief minister level aṭangin engkim kan chingfel dawn a ni," a ti a; hun rei tak an lo inbiak tawhna angin, harsatna zawng zawng chinfel theih ngei a nih dawn thu a sawi.
Zoramthanga chuan, Mizoram leh Assam ramri hmun hrang hrangah harsatna chi hrang hrang a awm thu sawiin, "Hengte hi kan chingfel thei ngei ang. Tuna inbiaknaah hian inhriatthiam tawnna ṭha tak a awm. A awlsam ber aṭangin bul kan ṭan dawn a, a awlsam sam kan chinfel hnuah chuan harsatnate pawh chinfel a awlsam lehzual tawh dawn a ni," a ti.
Chief Minister chuan, Mizoram palaite leh Assam palaite'n an inbiaknaah, Guwahati-a inbiak leh an remti tih sawiin, "Harsatna awm zawng zawngte hi chinfel a nih ngei ka ring," a ti a; Assam chuan hmarchhak state dangte tan hringtu a nih angin, thil tam takah pa chan a chan a rin thu a sawi.
Assam chief minister Himanta Biswa Sarma hnena telephone-a a sawi tawh ang leh inbe tura ruahmanna an neih angin, kumin August thla tàwpah emaw, September thla tìrah emaw New Delhi-ah an inbiak dawn thu CM Zoramthanga chuan a sawi bawk.
Assam palaite'n Chief Minister an kawm lai hian Assam CM Himanta Biswa Sarma-a'n phone-in CM Zoramthanga a bia a; kumin August thla tàwp emaw, September thla tìr lamah emaw New Delhi-a inbiak an remti dun a ni.

Mizoram leh Assam CM inbe dawn Harsatnate chinfel vek a ni dawn - CM

Lunglei leh Tlabung inkar NH-302 kawngpuia a chhe zual lai, Tuichawng leh Sihphirtlang inkar thawm ṭha tura kawng siamtute kar nan Tlabung Commercial Vehicle Joint Action Committee chuan nimin aṭang khan Lunglei-Tlabung kawngpui an dang.
Tlabung aṭanga thu dawn danin, Tla­bunga sumdawnna lirthei chi hrang hrang panga neitute'n an din Commer­cial Vehicle JAC hian an ruahman lâwk angin nimin zing dar 5:30 aṭang khan Tlabung dái, Sakuhtui bulah NH-302 kawngpui an dang ṭan a ni. Nimin khan NH kawngpui enkawltu NHIDCL leh kawng siamtu contractor-te nen inbe mah se, lungawina khawp an hmuh loh avangin nimin tlai thleng khan an la dang.
JAC hruaitute chuan, hun rei tak kawng siamtute an ngaichang tawh tih sawiin, an tum tak tak a nih chuan lirtheite tâng loa tluang taka an zawh theih tur tâwka a chhe zual lai thawm ṭhat nan hun a tam thawkhata an hriat thu an sawi a; kawng siamtute nen an indawrnaah ṭawngkam ṭha bak dawn an nei ngai lo a, tlànna tlaka kawng a ziaawm hma chuan kawngpui dan zel an tum thu an sawi bawk.
Commercial Vehicle JAC hian kawngpui dang mah se, rîkrum thila chhuah leh luh ngaite erawh chu an dang lo a ni.

Kawngpui chhe lutuk avangin Lunglei-Tlabung kawng dang

Disaster Management & Rehabilitation (DMR) minister Lalchamliana chuan nimin khan Secre­tariat Complex aṭangin DMR hnuaia State Emergency Operation Centre (SEOC) leh district tina District Emer­gency Operation Centre (DEOC)-ten rîkrum thil leh chhiatna a thlena an hman tur emergency response vehicle (ERV) 12 a vailiam. 
Lalchamliana chuan, tun hnaiah Mizoramah leimin leh kawngpuia chetsualna vangtein chhiatna hrang hrang a thleng tih sawiin, "A tuartute ka tawrhpui tak zet. Leimin tam zawk hi chu mihringin leilung kan tihdanglam vang niin a lang. Hmasawnna leh kan ni tin mamawh atana kan chêtnaah mahni chhiatna inthlen lo tura fimkhur a pawimawh," a ti.
Mizoram chu 15th Finance Commission-in khua­rel chhiatna a thlen thulha hman tur a ruahman­sak ṭha thawkhatah a ngai nia sawiin Minister chuan, "Kuminah cheng vbc. 45 vel hmu turah kan inbeisei," a ti a; disaster sumte chu kaihhruaina fel tak hnuaiah a hman dan tur siam a nih thu a sawi.
DMR Minister sawi danin, tun hnaiah Mizoram sorkarin Disaster Mitigation Fund hnuaiah chhiatna thleng thei hrang hrang venna tura hna thawhna atan cheng nuai 780 a ruahman a, chu chu SEC-in a pawm tawh a ni. 
Sorkar laipui aṭanga sum dawn, State Disaster Response Fund pung tling khawm aṭangin ERV-te hi lei a ni a; Fire & Emergency Service thuam chak nan kângṭhelh motor ṭha chi - high pressure pump fire tender pathum leh Central YMA hnenah ERV pakhat pek a lo ni tawh bawk.

Rîkrum thila hman tur lirthei vailiam

Chief minister Zoramthanga chuan, Myanmar tualchhung buaina avanga ráltlânte chu sorkar laipuiin India rama an rawn luh a remtih loh thu a sawi.
Myanmar râltlan Mizoram hmun hrang hranga awmte chhawmdawlna tur damdawi lam bungraw hrang hrangte MSU-in Project-Mizoram 2021-22 hnuaia an chahte nimina inhlan chhàwnnaah thu sawiin Chief Minister chuan, India ram chu ráltlânte dawngsawng thei tur ram, signatory a nih ve loh avangin Myanmar ráltlânte tana hmalaknaah harsatna an tawh phah thu a sawi a ni.
CM Zoramthanga chuan, "Myanmar aṭanga ráltlânte hi sorkar laipui chuan an lo luh a remti lo a, kîrtir leh tur tiin thuchhuah a siam. Sorkar laipui thu hi state tan zawm loh ngam chi a nih loh rualin, Mizoram chuan Legislative Assembly House-ah a puih zel tur thu a declare (puang) a ni," a ti.
Project Mizoram hlawhtlinna atan MSU, USA lama thawhpuite leh mi dangin theihtawp an chhuah hnuah bungraw hlan chhawnna neih a ni chu lawmawm a tih thu sawiin Zoramthanga chuan, "Bungruate hi a mamawhtute'n ṭangkai taka an hman nan theihtawpin hma la chhunzawm a, hlawhtlinna a lan belh zel ka besei," a ti a; bungraw chahtute'n an bungraw chah chu damdawi lam thil a nih avangin a dawnthleng tur (consignee) atan damdawi-in an hman a ngai a, inhawng taka BN Hospital-in consignee nih an inhuam chu lawmawm a tih thu a sawi.
Damdawi lam bungruate hi India pawisain cheng nuai 300 chuang man a ni a, BN Hospital & Research Centre hnenah hlan a ni.

Myanmar râltlânte an rawn luh Sorkar laipuiin a remti lo - CM

Mamit District Ṭhalai Pawl leh lirthei kaihhnawih páwl pangate chuan August 12, 2022 (Zirtawpni) ral hmaa Mamit leh Dâpchhuah inkar NH-44A chu lirthei chi tin tan zawh theih tura laih tlang a nih loh chuan August 13, 2022 aṭangin Dampui diversion road tiam chin awm loa dan an tum.
Hemi chungchangah hian Mamit District Ṭhalai Pawl, District Truck Owners Association, District Driver Association, Mamit Maxicab Welfare, Mamit Taxi Owners Association leh Mamit Pick-up Owners Association hruaitute chu August 9, Thawhlehni zan khan an inhmukhawm a; nimin khan thuchhuah an siam a ni.
An hmalakna turah hian Mamita YMA Sub-Headquarters, MZP leh MSU-te thawhpuiah sàwm an tum a; August 12, 2022-ah pawl tin aiawhte'n Dampui-Dapchhuah inkar NH-44A enho an tum bawk.
Mamit leh Dapchhuah inkar kawngpui chhe lutuk avang hian Mamita maxicab-te chu August 5, 2022 aṭang khan an tlân duh lo a, ni thum an tlân loh hnuah nimin aṭang khan an tlân ṭan leh a, tun kar Zirtawpni thleng tlàn rih phawt an tum a ni.
MAMIT DISTRICT-A PAWL PANGATE THU 1) Hun rei tak chhung Dàmpui leh Dâpchhuah inkar NH-44A leiminin a hnawh pin, Ratna Infrastructure company-te'n lirthei zawh theiha an thianfai ṭha hlei thei lo hi hriatthiam harsa kan ti hle a, Mamit district mipui zahlohna leh thamlohnaah kan ngai. 2) Dàmpui-Dâpchhuah inkar kawng hlui a chhiat tawh êm avang leh khualzin tan a him tâwk tawh lo hi pawi kan ti hle. 3) August 12, 2022 ral hmaa Mamit-Dapchhuah inkar NH-44A hi lirthei eng chi tan pawha zawh theih tura laih tlang a nih loh chuan August 13, 2022 aṭangin Dampui diversion road tiam chin awm loa block ni se. Mamit district mipui thlàwpna kan ngen a ni. 4) NH-44A siam hnathawh mekah side drain mumal taka siam hmuh tur a awm mang lo hi pawi kan ti. Mamit district mipuite'n NH-44A ṭha leh tlo zawk kan neih theih nan Ratna Infrastructure-te kumin 2022 chhung ngeia side drain siam chhuak vek turin kan ngen. 5) Dàmpui leh Dâpchhuah inkar kawng hlui hi Dàmpui khua mai bakah, Mamit district mipuite'n kan la chhawr ṭangkai reng avangin rintlak takin sorkarin siamṭha rawh se.

Pawl parukin Mamit kawng dan an tum

Mizorama treasury hrang hrangte chuan nimin khan sorkar hna a ngheta thawkte kumin July thla hlawh an pe chhuak ṭan. Nimin vêk khan sorkar laipui chuan chhiah a hmuh tling khawm aṭanga state-te chan tur Share of Central Taxes a pe chhuak.
Vanglaini thu dawn danin, treasury ṭhenkhat chuan nimin khan hlawh tur an pe chhuak zo hman lo a, vawiinah chuan pek chhuah kim theih an inbeisei.
Sorkar laipui chuan nimin khan state 28 tan Share of Central Taxes a pe chhuak a, a pek chhuah zawng zawng chu cheng vbc. 1,16,665.75 a tling a, state 28-te thla hnih atana an chanpual a ni. Mizoram bik tana pek chhuah zat chu cheng vbc. 583.34 a ni.
Share of Taxes hi Mizoramin sum a hmuh­na hnár lian ber a ni a, heta ṭanga kum kal mek 2022-23 chhunga hmuh tura beisei chu cheng vbc. 4,083.24 a ni.

Hlawh tur pek chhuah a ni ; Central-in Share of Taxes a pe

Congress party president Lalsawta chuan, "Ram roreltu nikhualo-ah hi chuan ram a him lo a ni," tiin, Mizoram dinhmun chu political party-a awmte ai mahin party-a awm lote'n an vei zawk tih chu chona a nih thu a sawi.

Mizoram Pradesh Youth Congress Committee-in nimina Hyve Aizawl City Hall-a intuaitharna an buatsaihah thu sawiin Lalsawta chuan, "Vawiinah hian kan ram tluchhe tur hi keini ai mahin political party-a awm ve lote'n an vei zawk tih hi challenge (chona) a tling. Politics-a awmte aia ram veitu an lo pun viau chuan vei a ṭul hle a ni, vei loh chi pawh a ni lo," a ti.
MPCC President chuan, "Ram roreltu nikhua lo-ah hi chuan ram a him lo a ni. Ṭhalai rualte hian, thluaka sum lut ka vei ve lo ang, ka kutah chuan sum a him ang, in tih tlat chuan Mizoram kan siamtha ṭhei a ni," a ti a; Congress ṭhalai hruaitute chuan ram siamṭha turin theihna an neih tâwk thu a sawi.
MPYCC president Dr Lalmalsawma pawhin thu sawiin, Congress ṭhalaite phûr taka an la kal zel chhan chu sorkar ṭha siam an tum tlat vang a nih thu a sawi a, "Congress sorkar liam ta khan thil ṭha tam tak kan tih laiin, tih fuh lo tam tak kan nei bawk ang. Kan dik lohnaahte huaisen takin kan insiamṭha zel dawn a ni," a ti.

Ram roreltu nikhualo-ah ram a him lo - Lalsawta

Mizoram leh Assam ramri buai chinfel dan tur zawnga Aizawla rawn zin Assam minister pahnih Atul Bora leh Ashok Singhal leh, Assam official-te chuan nimin khan chief minister Zoramthanga chu CM Banglaah an kâwm a, state ramri chungchang an sawiho.
CM Zoramthanga chuan, ramri buai chingfel turin theihtawp an chhuah dawn tih sawiin, August 9, Thawhlehniah inbiakna hlawhtling taka neih a ni chu lawmawm a tih thu a lo hrilh a; state pahnih sorkar leh mipui inkarah inhriatthiam tawnna leh inrin tawnna a awm zel a pawimawh tih sawiin, "Ramri buai chingfel tur chuan hun a duh rei dawn a, harsatna awm zawng zawngte vawi leh khatah chinfel theih ni lo mah se, a tahtawlin chinfel vek kan tum tur a ni," a ti.
Assam minister chuan, Zoramthanga chu politician tawnhriat ngah tak a nih avangin a chungah rinna an nghat tih an hrilh a; ramri buai chungchang chu state pahnih mipuite'n an pawm tlân theih tura chingfel turin theihtawp an chhuah dawn tih a sawi.
Zoramthanga chuan, Mizorama thar kuhvate Assam lamah police-in an lo man ṭhin tih sawiin, pawi a tih thu a sawi a; Assam police-te'n harsatna siam tawh lo se a duh thu leh chumi avanga Mizorama kuhva thartute'n harsatna an nei chu ngai pawimawha en zui turin Assam minister-te a chah a ni.
Chief Minister chuan, Mizorama kuhva tharte chu khawchhak lam aṭanga dan loa phurh luh kuhvate nen hriat hran a har lo tih sawiin, "Khawchhak lam aṭanga rawn kal chu a ro a ni a, Mizoram thar chu a ro hman lo a, a la hring reng a, en ringawt pawhin awlsam takin a hriat hran theih a ni," a ti.
CM Zoramthanga hi minister of state Lalruatkima’n a ṭawiawm a ni.

Mizoram-Assam ramri chungchang Assam minister-te'n CM an sawipui

General Administration Department chuan, India zalenna champha vawi 75-na lawmna pualin sorkar pisa zawng zawngte chu August 13-15, 2022 chhung an pisa ṭheuhah hnam puanzar zár vek turin a hriattir a, pisa hrang hranga thawkte chu an in ṭheuhah zár turin a hriattir bawk.
India zalenna champha vawi 75-na lawmna atan sorkar laipui chuan in tinah August 13-15, 2022 chhungin hnam puanzar zár turin ram mipui a ngen a; khua leh veng tina FCSCA department hnuaia retailer-ah leh hmun dang ṭhenkhatah hnam puanzar lei tur a awm a, Rs 20 man a ni.
Central YMA pawhin thuchhuah siamin, sorkarin a ngen angin, in tinah hnam puanzar zàr a nih theih nan a ṭul anga hma la turin YMA sub-headquarters, group leh branch-te an ngen a; CYMA Office-ah lei tur a awm thu a tarlang bawk.

Hnam puanzar zár turin inchah

Association for Environmental Preser-vation (ASEP) chuan nimin khan Lushai Hills Residency, Aizawlah leilung leh nungchate humhalhnaa thawk ṭha an thlan mi pathum an chawimawi a, Sustainable Development Goals campaign an hawng nghal.
ASEP hian thing phun leh nungcha humhalhnaa thawh hlâwk Lalsangpuia, Reiek hnenah Green Award, 
Rs 10,000 an hlan a; Tlawng lui dung mahnia zawh chhuaktu Romalsawma, Mission Vengthlang hnenah Environmental Conservation Award Rs 5,000 an hlân. Environmental campaign clip 200 chuang siamtu C Lalduhawma, Durtlang hnenah thuchei leh thilpek an hlàn bawk.
ASEP president K Lalmuansanga chuan, chawimawina an hlan tâkte chu environment humhalhnaa thawh hlâwk tak, an thawhrimna avanga chawimawi phûte an nih thu a sawi.

ASEP-in mi pathum an chawimawi

Health & Family Welfare (HFW) department leh Guwahati Neurological Research Centre (GNRC) chuan nimin khan Civil Hospital, Aizawl conference hall-ah stroke vanga harsatna neite enkawl dan zirhona an buatsaih a, Health minister Dr R Lalthangliana‘n a hmanpui.
HFW Minister chuan, stroke chu tunlai khawvelah buaipui tham a tling tih sawiin,"Mizoram mai ni lo, khawvel hmun hrang hrangah stroke vanga harsatna tâwk an tam hle. Hmànlai chuan a vei tam zawk hi kum upa lam an ni ṭhin a, tunlaiah erawh chuan naupang tak tak stroke an tam ta hle," a ti.
Stroke-in thihna a thlen êm loh pawhin a dam chhuakte taksa leh rilruah harsatna tam tak a thlen tih sawiin R Lalthangliana chuan, "Stroke laka kan invên a, a inenkawl dan kan thiam a pawimawh," a ti a; GNRC aṭanga doctor thiam lo kalte chungah lawmthu sawiin, Mizoram nen thawkho zel turin a sáwm a ni.
Khualzahawm Dr ZR Thiamsanga, MLA pawhin thu sawiin, zirhona chuan Mizorama doctor-te tan stroke laka invenna leh enkawlnaah hmasawnna a thlen ngei a beisei thu a sawi.
Zirhona hi HFW principal director Dr T Lalhmangaihi‘n a kaihruai a, GNRC aṭanga tel Dr Amit Ranjan Barua, Dr Krishna Chandra Narzary leh Dr Firdaus Ahmed ten kal khawmte an zirtir a; thupui chu 'Continuing medical education on managment of stroke' tih a ni.

Health department leh GNRC bultumin Stroke neite enkawl dan zirho a ni

MNF party chuan thuchhuah siamin, Covid-19 dona atana Mizoram sorkarin sum a hman dan chungchanga ZPM MLA Dr Vanlalthlana thu sawi chu a dik lo niin an tarlang a; thu dik tâwk lo hmanga mipui hruai kâwi tuma thu sawi lo turin an chah.
MLA Dr Vanlalthlana'n August 8, 2022-a ZPM pisaa Mizoram sorkarin Covid dona atan sum a hmang tlêm anga a sawi chu dâwt hmanga mipui hruai kâwina tur hmanruaa an ngaih thu sawiin MNF chuan, "Chanchinbu ṭhenkhatah phei chuan Covid do nan Dr Vanlalthlana thusawi la chhâwngin, state budget aṭanga cheng khat pawh hmang lo anga chhuah a ni hial kha pawi kan tiin hriatthiam harsa kan ti tak zet," an ti.
MNF tarlan danin, Covid-19 dona atan kum 2020-21 khan Mizoram budget aṭanga 0.30% hman a ni a, chu chu cheng vbc. 30 chuang a ni. Kum 2021-22 ah state budget aṭanga 0.64% hman leh a ni a, chu chu cheng vbc. 70 chuang a ni.
Covid-19 nasa takin a léng a, khawchhak lamah lìr a nghîng reng a, chhim lamah ram a kâng a, ramri a buai a, ráltlânte lo dawn sawn a ngai tih sawiin MNF chuan, "Budget-a dah lâwk loh sum tam tak sên a ngai. Heti chunga treasury khâr loa vawiin thlenga kan la awm thei hi Pu Zoramthanga, CM kaihhruai sorkar hi financial management a thiam hleah kan ngai," an ti.
MNF party chuan, hripui léng avangin Mizoram sorkarin central aṭanga sum a hmuh tur cheng vbc. 2,000 chuang a hmu lo nia sawiin, "Sum leh paiah harsatna kan tawh lai pawhin sorkar hnathawk hlawh la lo an awm lo leh mipui mamawh zualpui nghei loa vawiin thlenga kan kal thei hi ropui kan ti tak zet," an ti a; sum leh pai enkawlah Finance changtu CM Zoramthanga remhriatna leh thawhrimzia a lang niin an tarlang.

Thu dik loa mipui hruai kâwi tumah MNF-in MLA Dr Vanlalthlana an puh

Mamit DC chuan nimin khan thupek chhuahin, an district chhungah dan phal loh kuhva phur an tlan ṭhin tih hriat a nih thu a tarlang a, "Mamit district chhung khawi hmunah mah dan ang ni loa kuhva lakluh leh phurh khap tlat a ni," a ti.
Ministry of Home Affairs lehkhain (vide No.1/32/2019-BM-II Dt. 2.12.2019) heng dan loa kuhva rah lakluh ṭhin chu khap a ṭul thu a tarlang tih sawiin Mamit DC chuan, "Kuhva phurh tihtawp a nih theihna turin hmalak a ṭula hriat a nih avangin thupek hi chhuah a ni," a ti. Thupek bawhchhiate chu IPC section 188 hmanga hrem theih an ni.

Mamitah dan loa kuhva lakluh khap

Mizoram Youth Commission (MYC) buatsaih Super IAS 40 hnuaia UPSC coaching centre pathuma zir turte chuan Delhi-an thleng kim tawh a, MYC Chairman hoin an awmna tur an buaipui mek.
Sorkar thuchhuah tarlan danin, Vajiram & Ravi Coaching Institute-a zir turte chuan August 4, 2022 khan Delhi an thleng a, ALS Academy-a zir turte‘n August 6 khan Delhi an thleng. Vision IAS Academy-a zir turte‘n August 9, Thawhlehni khan Delhi an thleng leh bawk.
Super IAS 40 full sponsorship hnuaia coaching kal turte awmna tur buaipuiin MYC chairman Dr Vanlalṭanpuia, MLA leh official dangte‘n Delhi-ah an awm chilh mek a; kalna man, an awm man leh zir mante MYC-in a tumsak vek dawn a ni.

Coaching kal turte Delhi thleng kim

ZPM Aizawl City Block chuan nimin khan joint meeting an nei a; resolution siamin, mipui rilru piansualtirtu sum leh therhlo a thlàwna sem chu malmâk ngam turin mipui an ngen a, sum sem bànsan tawh turin political party-te an ngen bawk.
ZPM resolution chuan, "Retheihna khura mipui hruai lut a, sum leh therhlo a thlàwna sem tiam a, inthlêm chìn hi hmanraw bawlhhlawh tak, hnam retheihna thlentu, mipui rilru piansualtirtu a nih avangin tun aṭang chuan bànsan tawh turin party tin kan ngen a, bànsan thei lo an la awm a nih pawhin, mipui hmelma a ni tih hriaa malmâk ngam turin Zoram mipui kan ngen e," a ti.
"Sorkar laipuiin sum a rawn pek te, mipuiin chhiah kan pek tling khawmte leh, a pung nena rulh leh tura sorkarin sum a pûkte hi awmze nei leh fimkhur taka enkawl ni se, hna thawktute hlawh pek tur a awm ngei ang tih kan ring tlat a ni. Sum enkawl kawngah Chief Minister hi mualpho khawpin a hlawhchham tih inpawm tur leh Finance department hi enkawl thiam zawk a naute hnena hlan phal turin kan phût a ni," an ti bawk.