Paraguay rama digital lender lian, Ueno Bank tlakchhiat kaihhnawiha an ram president aṭanga paihthlak Santiago Pena chu Inrinni khan thubuai pahnih siamsak a ni. Judge thuppek angin a thubuai chhui a nih chhung chu military base-ah dah a ni ang.
Ueno Bank hi a tlakchhiat avangin Central Bank-in al a a, hemi hnua Ueno Bank-a account-te chu hrek vek niin, account neitute an sum dah pawh an lachhuak thei lo a ni. Hei bakah pension fund tam tham tak invest pawh khawih chet theih loha hrek a ni bawk. Ueno Bank hian customer mtd thum vel a nei a, hei vang account neitute mi tam tak an buai a, lungawi lohna pawh an lo lantir tawh a ni. President aṭang bang ta, Pena hi a hmain Ueno bank enkawltu Grupa Vazquez-ah shareholder a ni ṭhin. Bank tlakchhiat chungchang hi President hian pension fund dik lo taka hman leh, a hlawkna tam tak a lo tel tawhte thupna atana hmangah eptute chuan an puh a, bang turin an phut.
Kar liam ta Ningani khan banna a theh lut a, mahse hei hi Congress chuan pawm loin Zirtawpni khan Senate chuan Sena hi President a nihna aṭanga ban a nih leh nih loh chungchanga an ngaihtuah a ni. Vote lain lungrual takin Pena ban tir chu an pawm a, thupek an tihchhuak nghal bawk. Vice president nilai, Pedrol Alliana chu President thlaktur atan ruat nghal a ni.
Kar liam ta Inrinni khan Paraguay chief prosecutor, Nancy Salomon chuan press conference neiin, Pena chu rinawm loa puhna leh, ama mimal hlawkna turin ro rel a ni em tih chungchangah chhui chian a ni dawn tih a sawi. Presecutor-te chuan President hlui hi thubuai pahnihah hian thiam loh chantir a nih chuan kum 20 thleng lung-in tantir theih a ni dawn tih an sawi. A chungchang chhui chian a nih chhung chuan a thil neihte khawih chet theih loha hreksak turin judge an ngen bawk.
Central Bank chuan Inrinni khan Ueno bank customer zinga mtd 1.2 vel chu bank-a an sum dah ṭhenkhat pekkir an ni tih a sawi. Sum dahten an hmuh let theihna tura hma lak zel an tum tih an sawi bawk. Hetih lai hian Uneo bank-a pension fund dahte a him theihna turin, Paraguay-a zirtirtu pawl lian ber, member 40,000 chuang awmna chuan vawiin aṭangin an ram khawpuiah tiam chin awm loa nawrh huaihawt an tum.
