Tripura chief minister Manik Saha chuan Thawhlehni khan Sepahijala district-ah Rs vbc 50 senna hmasawnna project 18 a hawng a, a kaihhruai sorkar chuan ṭhalaite hmasawnna atan a hma a la chhunzawm zel dawn tih a sawi. Project-ah hian hriselna leh chhungkaw hamṭhatna tur pasarih awmin, education leh revenue department tan panga ve ve a awm tih official-te chuan an sawi.

Sonamura-a Sub-Divisional Magistrate (SDM) office sak thara hun hmana thu a sawiah, CM chuan ṭhalai lo awm zel tur tan sorkarin nasa takin hma a la tih a sawi. State-ah hmasawnna tam tak a awm tawh tih sawilangin, gross state domestic product (GSDP)-ah Tripura chu pahnihna an nih thu sawiin, hmarchhak biala per capita income-ah pahnihna an ni tih a sawi bawk.

CM Saha chuan infrastructure tihchangtlung a nih loh chuan state-ah hmasawnna a awm thei lo tih tarlangin, infrastructure tihhmasawnna atan kum 2025-26 ah Rs vbc 7,000 dah a nih thu a tarlang. Dan leh thupek dinhmun pawhin hma a sawn tih a sawi bawk a ni.

State hmasawnna atan thawh hona ṭha neih a pawimawh tih sawiin, mipui harsatna a rang lama chingfel thei tur 'Amar Sarkar', CM Helpline, 'Mukhyamantri Samipeshu' leh a dangte tlangzarh a ni tih a sawi. Kum 2018 aṭanga tun thlengin sorkar hna mi 20,184 hnenah pek an ni tawh tih a tarlang bawk.