Manipur-a Petroleum leh LPG transporter pawl hrang hrangte chuan, chief minister Yumnam Khemchand Singh chu National Highway-37-a dan loa sum in laksak thleng ṭhin nia sawi tihtawp a nih theihna atan a rang lama hma la turin an ngen. He buaina hi chinfel a nih loh chuan July 31 aṭangin an hnathawh tihtawp lailawk an tum tih an tarlang.

Nilainia memorandum an theh luhah, All Manipur Petroleum Products Transporters Association leh transport body pakuate chuan Imphal leh Jiribam inkara fuel phurtu tanker operator-te chu dan loa sum pe tura nawr an nih thu an sawi. Petroleum, oil leh lubcricant (POL) leh LPG tanker-te chu state-a kum 2023 May thla aṭanga hnam leh hnam inkara buaina a chhuah aṭangin NH-37 ah hian venhimna hnuaiah hna an thawk tih an sawi.

Memorandum-ah hian tanker 100 dawn chu highway-ah hian dan loa pawisa chawi tura tih an ni a, sum an phut chu nasa taka tihsan a ni tih sawiin, truck pakhata Rs 200 khawn ṭhin chu Rs 7,000 ah tihpun a ni tih an tarlang bawk. Pawl hrang hrangte chuan harsatna an tawh chu thuneitute hnenah vawi tam tak an thlen tawh thu leh, tun thlengin hma lak a la ni lo tih an sawi. Hetianga dan loa pawisa inchawitirna senso chu phurrit nasa tak a ni tih an sawi bawk.

Pawl hrang hrangte hian Chief Minister chu dan loa pawisa inchawitir nia sawite chu July 30 hma ngeia tihtawp a nih theihna atan hma la turin an ngen a, hma lak a nih loh chuan July 31 aṭangin petroleum leh LPG tanker-te phur chhuah a ni tawh dawn lo tih an sawi a ni.