Dan dik loin MLA fund ka hmang lo - Dr K Beichhua

Siaha bialtu MLA Dr K Beichhua, minister of state chuan, dan dik loin MLA fund hman a neih loh thu Vanglaini a hrilh. Tarlan tawh angin, Vanglaini-in RTI Act hmang zawhna Planning & Programme Implementation department-in an chhan dan chuan, Dr K Beichhuaa'n MLA fund a hman danah dik tâwk lo a awm a ni.

Dr K Beichhua chuan, MLA LADS fund guidelines-ah grant-in-aid in health leh education-ah a pek theih thu a sawi a, "Chumi ang chuan grant-in-aid in Siaha District Hospital Medical Superintendent hnenah pek a ni a, ani hian ka bial chhung mipui mamawh ber tura a ngaih avangin damdawi-ina hman tur leh mobile clinic-a hman tur Siaha bial mipui tan a leisak mai a ni a, dan kalh a nihna a awm lo. Education-ah zirtirtute an chhawr a, lehkhabu an lei a, computer-te lei a ni ṭhin; chutiang chiah chu a ni," a ti.

Planning department-in RTI Act hmanga zawhna an chhan dan chuan, December 12, 2015 khan Siaha SDO(C) chuan Planning department hnenah Siaha bialtu MLA Dr K Beichhuaa'n kum 2015-16 MLA fund aṭangin damdawi leina leh clinic a hawnna atan Rs. 6,50,000 hman chungchang a thlen. Siaha biala thingtlang khuaa mipui hriselna turin a thlawna damdawi sem tur leina atan hman a nih thu te, Siaha district chu IMR leh MMR sànna a nih avangin sum hmanna chu pawmpui turin a ngen a ni. 

Planning department chuan Siaha bialtu MLA sum hmanna chu Assembly hnuaia General Purpose Committee (GPC) sawifiah turin January 27, 2016-ah Assembly Secretary hnenah a thawn. Assembly Secretary chuan February 5, 2016-ah Planning department hnenah thawn lêtin, Assembly Speaker leh GPC Chairman ni bawk hoin ngun takin an enfiah a, MLA fund hmanga damdawi lei leh clinic hawn chu MLA LADS kaihhruaina para 2:1 leh 2:2 nen a inmil loh thu leh, MLA Dr K Beichhua chu sum hman a remchan loh dan thurâwn pe turin a hriattir a ni.

Planning department chuan February 11, 2016 khan Siaha district SDO hnenah, Dr K Beichhua chu MLA fund hman chhunzawm tawh lo tura thuràwn lo pe turin a thawn a ni. 



Share this Post

Login to comment
No Comments