Tripura camp-a Mizoram Bru endik mekah Chhungkaw 325-a mi 1,575 endik a ni tawh

July 3, 2019 aṭanga Tripura-a Bru refugee camp paruka Bru-te endik hna thawh chu chhunzawm zel a ni. July 15, Thawhṭanni thleng khan chhungkaw 325-ah mi 1,575 endik tawh an ni a, kum 2006-a endik tawhte nen, Mizorama hruai kîr theih tura endik tawh zawng zawng zat chu chhungkaw 4,273-ah mi 25,659 an ni.

September 2019 ral hmaa Mizoram khua leh tui Bru-te Mizorama lak lêtna turah Tripura camp paruka Bru-te chu endik mek a ni a; endik hna hi MCS officer pasarih leh anmahni puitute'n an thawk. Endik tawh zat chu Mamit DC Office-a Bru Cell-ah an pe khawm zel ṭhin.

Mamit DC Office Bru Cell-in an chhinchhiah danin, July 3-15, 2019 chhunga district pathum - Mamit, Kolasib leh Lunglei district-a Bru endik tawh zawng zawng zat chu chhungkaw 325-a mi 1,575 an ni a; chu'ngte chu endik thar chhungkaw 280-a mi 1,338 leh kum 2016 format hmanga endik thar chhungkaw 45-a mi 237 an ni.

Kum 2006-a Bru verification tih a nih ṭumin camp parukah Mizoram mi leh sa Bru chhungkaw 3,948-a mi 24,184 endik an lo ni tawh a; chu'ngte nen chuan Mizoram Bru, Tripura refugee camp-a awm mek endik tawh zawng zawng chu chhungkaw 4,273 aṭangin mi 25,659 an tling.

Bru endiknaa MCS officer kalte chu - Lalhmingliana, Dr Saithangpuia, R Vanrengpuia, Lalchhanhima, Benjamin Zalawma Ralte, Samuel Zodinsanga, Timothy R Lalhmangaiha leh Hmingmawizuala te an ni a; July 20, 2019 thleng endik hna thawk tura tih an ni.

Phek 2-ah chhunzawm a ni



Share this Post

Login to comment
No Comments