Traffic jam ziaawmna tura MBA rawtte Home Minister kaihhruaiin sawiho a ni

Mizoram Bar Association (MBA)-in Aizawl khawpui traffic jam tihziaawmna atana rawtna an neih hrang hrangte chu nimin khan Coordination Committee on Traffic Management-in an chairman Lalchamliana, Home minister kaihhruaiin a pisaah an sawiho.

MBA-te hian Gauhati High Court, Aizawl Bench-ah PIL thehlutin, Aizawl khawpui traffic jam a ziaawm theihna tura an zir chianna aṭanga an thil hmuh hrang hrangte an tarlang. Court chuan thutlukna siamin, Mizoram sorkar leh Aizawl Municipal Corporation (AMC) tih tur hrang hrangte a siam a ni.

Gauhati High Court chuan, state sorkar leh AMC chu damdawi-in leh sikul hawn thar leh tihlen turah damdawi-in leh sikul din turte'n thawktute, damlote leh anmahni tlawhtute tana lirthei hûnna (parking place), an ram chhungah emaw, building huam chhungah an neih leh neih loh finfiah hmasa loa pawmpui lo turin a hriattir a ni.

AMC-te chu AMC Building Regulations, 2012 siamṭha turin High Court chuan a hriattir a; Building Regulations-ah chuan damdawi-in leh sikulte'n parking place an mamawh dan an tichiang tur a ni. Parking hmun tur zat tihchian a nih hma chuan sikul leh damdawi-in din tura pawmpuina an pek a khap.

High Court thupek ang chuan, mimalin vantlang kawng an nêk loh nan state sorkar leh AMC ten hma an la tur a ni. Chumi atan chuan thuneitu, dan loa in sak leh vantlang ram nêk ṭhiahsak theihna thlenga siamin, Bawngkawn-Kulikawn inkar main road chauh ni lo, veng chhung kawng tê zawkahte pawh dan loa thil tite hunbi neia enfiahtu tur squad din chungchangah hma la tel turin a hriattir bawk.



Share this Post

Login to comment
No Comments