Assam Forest dept. an la chhuak lo Chhuahtir turin MZP-in HM an ngen

Vairengte leh Lailapur (Assam) inkara sipai cinema hall hlui luahtu Assam Forest department mite chu July 6, 2019 aṭanga khan thlengin an la awm zel a, chhuahtir an la ni lo. Hetih lai hian, MZP chuan nimin khan Home minister Lalchamliana hnenah, Assam Forest-te chu July 12, 2019 ral hmaa chhuahtir tura ngenna an thlen.

Vairengtea aṭanga Vanglaini thu dawn danin, Assam Forest department mi,  sipai cinema hall hlui chei ṭhaa luah zuitute hi nimin thleng khan an la awm a, CRPF sipaite'n an veng ṭhin a ni.

July 8, 2019 khan hemi chungchang ngaihtuah hian MZP Executive Committee an ṭhukhawm a, Assam Forest mi leh sate chu July 12, 2019 ral hmaa Mizoram sorkarin a chhuahtir lo a nih chuan July 17, 2019 ral hma ngeiin Bairabi Zophaiah Zo fate Chawlhbuk sa turin Mizoram sorkar an phût ve thung a ni.

Vanglaini palai zawhna chhangin MZP president 

L Ramdinliana Renthlei chuan, an thil ngen chungchangah sorkar 

aṭangin chhanna an la dawn loh thu a sawi a, "Home Minister hnenah nimin khan ngenna kan thlen leh a, a copy pawh Chief Secretary leh Home Secretary kan pe a ni," a ti.

Home department official-te chuan Vanglaini palai zawhna chhangin, sorkar thuneitute 

aṭanga hemi chungchanga hmalak dan tur an la dawn loh avangin Assam Forest mi leh sate'n sipai cinema hall an chhuahsan theihna atan ruahmanna an la neih loh thu an sawi.

MZP chuan, Home Minister hnenah hian Mizoram leh Assam ramri chungchang ngaihtuahtu tur Core Committee din a nih thu tarlangin, Core Committee -in ramri chungchang chhuia hma a lak dan chu MZP chuan a beitham an ti hle a, Core Committee hian chak zawka hma a lak theih nana nawrpui turin  Home Minister chu an ngen a ni.

Vairengte dái, Mizoram chhung ngeia ngaih hmuna a Assam Forest-in in an sa ṭha a, an luah nghal chu an hrethiam thei dawn lo tih sawi nawnin MZP  hruaitute chuan, "Assam Forest hian he lai hmun hi chhuahsan se kan duh tak zet a, kan huntiam ral hmaa an chhuahsan theih nan theihtawp min chhuahpui ngei kan beisei a ni," Home Minister hnenah chuan an ti.

Assam Forest-te chu an chhuak lo a nih a,  Zophaia Mizoram sorkarin Zofate Chawlhbuk a sak loh bawk chuan,  July 19, 2019-ah 'Ram chhan kawng zawh' neih an tum tih MZP chuan, Home Minister hnenah hian an thlen nawn leh a ni.

Tarlan tawh angin July 8-a chief minister Zoramthanga hoa council of minister ṭhukhawm chuan Mizoram ramri atan Bengal Eastern Frontier Regulation, 1875 an pawm a ni.



Share this Post

Login to comment
No Comments