Green Mizoram Day hman a ni Economy-a hma hruaina tur atan Rua hman kan tum - CM Zorama

Nimin khan Mizoram hmun hrang hrangah Green Mizoram Day hman a ni a, Aizawlah chuan chief minister Zoramthanga hoin Assam Rifles 23 Sector hmun, Khatlaah hman a ni. Chief Minister chuan, economy-a Mizoramin hma a hruai theihna atan ruá hman tum a nih thu a sawi.

Chief Minister chuan, Mizoramah ram hring dup neih an duh a nih chuan inkuangkuah mai a tâwk thu a sawi a, "Mahse, mihringin eizawnna kan mamawh a, chumi atan chuan kan insiam rem a ngai. Thingtlanga tlang ram lo neitute hi titawp tawh rawh u, tih ngawt chi a ni si lo. Engkim hring dup khawpa ṭhat duhna ram kan ni a, economic plantation tih a ngai," a ti.

Rua hmangin economic plantation kalpui a nih dawn thu sawiin Zoramthanga chuan, "Rua hi eizawnna atana ṭha ber, hahdam ber, ruahtui vawnhimna atana ṭha leh boruak tihthianghlimna atana ṭha ber a ni. Enkawl a ngai lo a, a puitlin tawh chuan a seng hun nghah a ni mai," a ti a; rua hmangin buh ṭin nga hmunah cheng nuai 50-70 thar theih a nih thu a sawi.

Chief Minister chuan, rua chu mipuite hausaa siam theihna ṭha a nih thu sawiin, "Economy-a hma hruaina atana hman kan tum. Inrinni hian NITI Aayog meeting a awm dawn a, chutah pawh chuan rua ṭangkaina sawi ka tum," a ti a; India hmarchhaka helnate pawh rua hmanga tihtawp theih a nih thu sawiin, "Delhi-in in phal leh phal loh a ni mai ka ti ang. Miin maktaduai tél la lut se, tumah an rammu peih lo ang," a ti.

Green Mizoram hnuaiah kum 20 chhung hmalak tawh ni mah se, hmasawnna duhkhawp a nih loh thu sawiin CM Zorama chuan, "A chhan chu kan thing phun a tê lutuk a, kan chíl chhe leh mai ṭhin. Mihring aia sang kan phun tawh tur a ni," a ti a; thing lian zawk phun a nih theih nan hma la turin Environment, Forest & Climate Change (EFCC) department hotute a chah.

Inkhawm kaihruaitu EFCC minister TJ Lalnuntluanga chuan khua a lum chak thu sawiin, "Thla hmasa phei kha chuan Aizawla khaw lum ber ní record a in break chho char char a ni. Khua a lum chho zel te, ramngaw chereu zelte leh ruahsur dan a mumal lote venhimna atan thing phun uar a ṭul," a ti a; ramngawte uluk taka enkawl a pawimawh thu a sawi.

Principal chief conservator of forest (PCCF) Dr Ch. M Rao tarlan danin, Green Mizoram Day hman ṭan kum 1999 aṭanga kum 2018 thleng khan thing ṭiak 38,46,053 phun a ni tawh a, kum 2013 aṭangin thing phunte a nung em tih chhinchhiah ṭan a ni.

Kumin hian Thlado, Khuangthlí, April, Làmkhuang, Cháwmzil, Tei, Teipui, Theihai, Lenhmui, Ashoka tree, Silver Oak, Herhsè, Tâtkáwng, Hmuipui, Ficus, Theitât, Araucaria, Nganbàwm, Archangkáwm, Thingrái, Ngiau, Thingsaphí, Tlaizawng, Sunhlu, Vaube, Zawngṭah, Makpazangkâng, etc. phun a ni ang.

Inkhawmah hian kângmei venhim kawnga thawk ṭha district leh Aizawl district-a kângmei ven kawnga thawk ṭha khuate hnenah lawmman hlan a ni. District zingah Champhai district pakhatna a ni a, Lawngtlai district chu pahnihna niin, Kolasib leh Mamit district-te pathumna an ni. Aizawl district-ah kângmei veng ṭha ber chu Maubuang an ni a, Chhuanthar Tlangnuam leh Phulpuite chu pahnihna leh pathumna an ni.

Inkhawm zawhah Assam Rifles 23 Sector hmunah Chief Minister, minister te, MLA-te leh official-te'n thing an phun nghal.



Share this Post

Login to comment
No Comments