Leiba rulh hleih theih lohna thangah Kan lut mai ang tih a hlauhawm hle - Dr Vanlalthlana, MLA

ZPM MLA Dr Vanlalthlana chuan, chief minister Zoramthanga chu MNF sorkar hmasaah Finance department enkawltu a ni tawh a, a sulhnu aṭangin sorkar sum enkawl thiam tak a ni lo tih a chian tawh thu a sawi. "Tunah Finance a enkawl leh a, sum hmanna turte ngaihtuahin, leiba rulh hleih theih lohna thang (debt trap)-ah kan lut mai ang tih a hlauhawm hle a ni," a ti.

Dr Vanlalthlana hian nimin khan ZPM pisaa inkhawmah thu sawiin, "Kum 1998-2008 chhunga MNF ministry-ah tuna kan CM hi Finance minister niin, financial management ropui lo tak kan lo tawng tawh," a ti a; kum 2001-2008 chhunga kan state sorkar thawh chhuah (GSDP) leh leibá chu state sorkar dangte aia chhe lawr lak a nih thu a sawi.

Dr Vanlalthlana sawi danin, MNF sorkar laiin state dangte chu an GSDP aṭanga an leiba chawhrual chu 38% a nih laiin, Mizoram chu GSDP aṭangin leibá chu 92% a tling a, kum 2004-2008 chhung phei chuan 100% a pêl a ni.

MNF sorkar hmasaa CM leh Finance minister ni kawp thoin tunah CM nih leh Finance minister hna a enkawl kawp leh ta tih sawiin Vanlalthlana chuan, "14th. Finance Commission-in sum a hmuh zawng zawng aṭanga Mizoram sorkara pek tur hi 0.46% chauh a ni a, kan state budget-in a daih dawn lo hle. Chutih laiin, sum tak tam senna tur - cheng nuai thum semna tur SEDP, district pathum siam belhna tur, zirtirtu 900 chuang lak belhna tur, kawng chhâwng siam leh developmental work dangte a awm. Debt trap-ah kan lut mai ang tih a hlauhawm hle a ni," a ti.

ZPM MLA chuan, Mizote chu India ram hmun danga mite nena khaikhinin mihring (population) pung tam lo ber pawl nia hriat a nih ṭhin laiin, kum 1971 aṭanga state zawng zawng punna tarlan danin, 267% laiin Mizoram population a pung tih a sawi a, "Hei hi Mizo mipui kan inthlah pun chak vang ni loin, foreigner chám hlen kan ngah lutuk te, vote zawn nana foreigner kan intlawnsiak ṭhin vang te, lo luh belh tur kan dan mumal loh vangte a ni," a ti a; dan loa foreigner awmte chinfel chu sorkarna chan hlan an nghahhlelh chhante zinga mi a nih thu a sawi.

Mizorama zirna kalpui dan chu siamṭhat a ngai hle tih sawiin Dr Vanlalthlana chuan, "Education Minister hi MZP president hlui, zirlaite tana hmathlir thui tak nei nia kan hriat laiin, sorkarin dan a neih sa zuan kâna hmalak tumna a awm hi a zia lo hle. Kan education hi party mal induhsakna atana hman a ni ṭhin hi a pawi a, ZPM chuan na takin kan dodal zel dawn a ni," a ti.

Aizawl North-II bialtu MLA chuan, inthlan an hmachhawn vawi khatnaah MLA pariat an nei chu thil ropui tak a nih thu sawiin, "ZPM hi nula hmelṭha, ngaihzâwnawm tak angin min han hmu a, kan han intuaihnúm dawn chauh a ni," a ti a; Mizoramah sorkar ṭha, hleih nei lo sorkar leh Mizoram humhalh ngam sorkar a din theih nan ṭan an lak zel dawn thu a sawi a ni.



Share this Post

Login to comment
No Comments