Election official-te chêt zui dan hian Kan ngaih a ti ṭha lo - MPCC & ZPM

MPCC & ZPM Publi­city Committee chuan thuchhuah siamin, Lok Sabha MP inthlanpui Mizorama neihah har­satna lian tham awm loin tluang takin inthlan kalpui nia an ngaih thu tarlangin, "Hetih laia election official-te chêt zui dan hian kan ngaih a tiṭha lo hle. Election official-te state sorkarin a thunun nia a lan avangin an laka rinna nghah har kan ti ta hle a ni," an ti.

MPCC & ZPM tarlan danin, inthlan vote thlak ní April 11, 2019-a Vanglaini chanchinbu chhuakah MNF party candidate C Lal­rosanga symbol leh independent candidate Lalthlamuani symbol tihsual palh ve ve a ni. Vanglaini chanchinbu-in an tisual tih an hriat veleh an chanchinbu copy pawh a theih ang angin an hnûkkîr leh nghal a, ngaihdam dilna an siam nghal bakah, a tûkah chan­chinbuah an siam zui a ni.

Vanglaini chanchin­buin ngaihdam an dil mawlh mawlh chungin MNF party chuan Chief Electoral Officer (CEO) hnenah complaint an thehlut a, April 11, 2019 khan Vanglaini enkawl­tute lakah hian MP election-a Returning Officer (Aizawl DC/DEO) chuan Aizawl Police Station-ah FIR a thehlut zui a ni.Hetih lai hian, Lunglei district lama polling booth hrang hranga MP candidate-te hming list an tarlanah, serial no. 4-a awm Lal Hriatrenga Chhangte leh serial no. 5-a awm Lalnghinglova Hmar-te chu an serial number thlakthleng a ni.

Serial no. thlakthleng chu thil pawi tak a nih theih avangin MPCC leh ZPM chuan April 11, inthlan ní-ah vek CEO hnenah complaint an thehlut ve nghal a; complaint an thehluhah hian thil dik lo chhui tura FIR thehluh chu sawi loh, mawhphurtute laka action lak a awm thu tun thlengin hriat a la ni lo.MPCC & ZPM chuan, Vanglaini-in election symbol pahnih an tihsual chungchangah pakhat zawk, Lalthlamuani symbol chungchang chu Election official-te'n engahmah an ngaih loh laiin, MNF symbol tihsual zawkah chauh FIR an thehlut tih an sawi a; chutih laiin, CEO hnena MPCC leh ZPM-te'n  complaint an siam erawhin ngaih pawimawh a hlawh lo chu mak an tih thu leh vanduaithlak an tih thu an sawi a ni.

Election official-te chu hleih nei taka chê-ah puhin MPCC leh ZPM chuan, "Kan lungawi lo tak zet a ni. Lunglei district polling station hrang hranga serial number thlakthleng chung­changah hian Re­tur­ning Officer chu mawh­phurtu a nih ang ngeia a rang thei ang bera a chunga action la ngei turin CEO kan phût a ni," an ti. 



Share this Post

Login to comment
No Comments