Kalphung ngai hmangin ram hruai an tum - ZPM Leader

Zoram Peoples Move­ment (ZPM) leader K Sapdanga chuan, political party ṭhenkhat chuan kum 30 vel kal tawha an kal­phung ngai hmanga ram hruai an la tum thu a sawi.

Aizawl East-I biala ZPM candidate K Sapdanga chuan nimin zinga Muana Veng, Zuangtuia ZPM Campaign Information Office a hawnaah thu sawiin, "Party ṭhenkhat chuan kum 30 vel kal tawha an kalphung pangngai hmanga ram kaihhruai tumin an inzuar a ni. ZPM chuan chief minister la ni ngai lo leh hmingchhiatna la nei lo, rambuai laia Mizoram ṭhatna tura nasa taka beitu kan zuar thung. Ram hlui zia paih a, ZPM thlang tling a, an kuta thuneihna hlan turin mipuite ka ngen a ni," a ti.

K Sapdanga chuan, Aizawl East-I bial chhungah chhungkua 6,911 an awm tih sawiin, "Chhungkua zawng zawngte hi a kip a kawiin tlawh chhuak vek lo mah ila, kawng leh step awm zawng zawng chu kan kal chhuah deuh vek tawh avangin, East-I bial hi ka bial hriat chian ve ber a ni. A bikin veng mawng lamah vawiin thlenga sorkar tui la in phak lo te, sorkar step-in a la pawh lohna hmun eng emaw zat a la awm," a ti a; step siam ngaihna lai te, lei dawh ngaihna laite a hriat chian tawh thu a sawi.



Share this Post

Login to comment
No Comments