Mizorama tuialhthei zawngtute'n An beisei ang la hmu chhuak lo

Mizoram hmun hrang hranga tuialhthei zawn hna company-te'n an thawhnaah an duh ang tuialhthei an la hmu thei lo. Hetih lai hian, Meidumah chuan gas eng emaw zat hmuh a ni. 

Mizoramah hian tuialhthei zawn hna hi Oil & Natural Gas Corporation (ONGC), Oil India Ltd. (OIL) leh Reliance Natural Resources Ltd. (RNRL) ten an thawk a; mahse, RNRL-te chu an thawh ṭhat loh avangin bàn an ni.

RNRL-ah hian company pathum - Reliance, Geo Petrol International (France) leh NAFTGAZ (Ukraine) te an awm a; chu'ng zingah chuan Reliance-in chan (share) an ngah ber.

RNRL hi Mizoram chhim lama tuialhthei leh gas zawng turin kum 2007-ah thlan ni tawh mah se, hnathawh mumal an la nei lo a, estimate leh lei verhna hmun tur pawh an la siam lo a, chuvang chuan bân an ni.

OIL-te chuan Maubuang ram leh Keifang daiah tuialhthei zawn hna an thawk tawh a, mahse an duh ang an hmuh loh avangin heng hmun pahnihah hian hna an chawlhsan tawh.

Hetih lai hian, Geology & Mineral Resources (GMR) department hotute chuan Vanglaini palai zawhna chhangin, Maubuang ramah tuialhthei tlem azawng a awm tih sawiin, "Company lam hian hlawhchham chiang angin an insawi a, mahse, tlem azawng chu a awmin kan hria. Anni lam chuan sumdawnna tham an duh avangin, a zawn hna an chawlhsan a ni," an ti.

OIL hi tunlai hian Phulmawi, Thenzawl leh South Sabual bul velah tuialthei zawn hna thawk turin an inbuatsaih leh mek a, two dimensional seismic survey hmangin chhim lam leh Champhai leh a chhehvelah tuialhthei a awm leh awm loh zir chian hna thawh leh an tum.

GMR hotute sawi danin, Meidum leh Hortoki inkara tuialthei zawn hna thawktu ONGC chuan gas eng emaw zat an hmu chhuak a, mahse, tun dinhmunah chuan hna an thawh chhunzawm hrih lo a, hmun dang an dap leh mek. Meidum leh Hortoki inkarah hian gas ni tin standard cubic nuai 5.5 laih chhuah theih beisei a ni.

ONGC-te hian Suarhliap, Mamit district-ah tuialthei zawn hna thawk ṭan turin an inbuatsaih mek a, Suarhliap mipuite kokhawmin, tuialhthei zawn hna thawh an remtih leh tih lohte leh thil pawimawh hrang hrang an sawipui tawh. 

Hei bakah hian, ONGC chuan Vairengte velah tuialthei a awm leh awm loh thlawh­theihna hmanga zir chian an tum a, thlawh­theihna thlawh kual vel phalna Mizoram sorkarin sorkar laipuiah an dilsak tawh a ni. 



Share this Post

Login to comment
No Comments