Kan rama rua leh maute hi Hmang ṭangkai zawk se - Duhoma

MLA Lalduhoma chuan, ram dang rua lâk luh a, a chî supply-tu nih duh vanga phílí chung loin, Mizorama tualṭo rua leh maute ngei hman ṭangkai zawk ni se a duh thu a sawi a, "IAS-te'n bàn phah nan êm an hmang lo a nih pawhin, kuttuma ei zawng mi tam tak tan malsawmna a ni ngei ang," a ti.

Lalduhoma hian nimin khan Aizawl Press Club-ah thuthar thehdarhtute a kâwm a; chief minister Zoram­thanga'n sorkar flagship programme chu mau ni loin, rua a nih zawk thu a puang ṭhin tih sawiin, "A sawi dan chuan, IAS-te pawhin bàn an duh phah hialna tur a nih bakah, hmarchhaka helna tihrehna tur hmanrua leh economic independence min petu tur a ni. Kum khat chhungin a tuaiin a nu a tiat hman thu a sawi hi chu a pawmawm khawp mai," a ti a; rua leh mau eng chi pawh, a len leh san zawngah kum khat chhungin an nih tur ang a nih vek thu a sawi.

CM Zoramthanga'n rua chìntír a tum chu Brandisii leh Latiforus a nih thu sawiin Duhoma chuan, "Phùrpui tlak a ni tak meuh em tih hi, chìn hmain hriat hmasak a ṭul. Brandisii hi Manipur-ah chuan Jeribam chhehvelah a tualṭo a, Meitei ho chuan ‘Wanan’ an ti a, an changkânpui lêm lo. Andaman, Myanmar leh Thailand-ahte an tualṭo bawk. Karnataka-a Coorg dis­trict-ah Burma aṭanga an lak luhna a rei tawh hle a, ‘Burma rua’ an ti mai. Chuta ṭang chuan India chhim lamah an chíng darh nual a ni," a ti.

Lalduhoma sawi danin, Brandisii chu hung nei, a lian leh ngil tak, a tuai ei tlak a ni a, zár a ngah a, hlâwi zung zung a ngai a, a rit a, thâ a heh hle. Tualṭo a nih lohna hmunah chuan natna a ngah a, enkawl ngun a ngai. Tui a pai tam a, a duap a, a ngêt zung zung a, sâwngbàwl a nih loh chuan kum khat a daih meuh lo. Kum 45-50 danah a tám ṭhin a, thlangrá, hnáng, pal ban, leilàwn leh agarbati kuangah an hmang ber a ni.

Latiforus chu Taiwan, China leh Myanmar rama tualṭo a ni thung. A hung a lian a, rua zingah chuan a sang thei ber a, a cháng a khát hle. A tuai erawh a ei tlak vak loh a, a tám ṭhin bawk. A duap a, natna a ngah a, a tlo lo a, sâwngbàwl loh chuan kum khat a daih lo. Thil siam nan company-te'n an la hmang ngai lo a, raw hriat hlawh lo tak a ni. Sorkar laipuiin a pawmpui (recognised) zingah pawh a tel lo.

Hetih lai hian, hung nei lo chi, China rua ‘Maso’ an tih chu a pung chak a, a tuai a tui a, sah a nuam bawk a, mithiamte'n chìn atan an duh zawk. Congress sorkar kal ta pawh khan Maso lak luh tumin hma an la nual tawh a ni.

Lalduhoma chuan, CM Zoramthanga'n a dàwr ber chu Growmore Biotech neitu Dr Barathi nia a lan thu sawiin, "Dr Barathi hian a buaipui ber chu, Beema Bamboo an tih, tissue cul­ture aṭanga chi dang deuh hlek siam chhuah a ni a, an website-ah engkim hmuh theih a ni. Brandisii leh Latiforus-te hi, Kerala Research Institute, Peechi-ah te, Institute of Wood Science and Technology, Bangalore-ah leh hmun dangah a chî lei tur a tam mai. Heng rua leh maute hi kan CM-in a sawi anga ṭha chu ni se, India ram khat dul khawpin an chíng daih tawh ang," a ti.

Pathianin Mizorama a dah sa hmusit a, ram dang thil ngaihsan inzirtir chu sual a tlin thu sawiin Lalduhoma chuan, "Kan rama tualṭo mautak (Melocanna Baccifera) te, rawṭhing (Bambusa Tulda) te, rawnàl (D. Longispathus) te hi an ṭha em em vek. Heng hmang hian Mutha Industry, Tripura chuan bamboowood leh a dangte an siam a, airport hrang hrangah chhuat leh banga hman tur an pe reng a, tunah hian kum thum daih supply order an nei mek a ni," a ti a; ram dang aṭanga la lut loin, Mizorama awm sate hman ṭangkai ni zawk se an duh thu a sawi.

Lalduhoma chuan, July 15, 2019-a Horticulture programme-ah CM Zoram­thanga'n raw chi ṭha 3,000 vel hardening tura phun a nih tawh thu te, 10,000 dang a thlen leh tur thu te, maktaduai 10 vel phun tur an mamawh thu te, Assembly session-ah Brandisii ṭiak thla tin nuai 10 vel rawn thawn an tum thu te, Lengte ramah kûng 17,000 vel chìn mek a nih thute a sawi a; chutih laiin, RTI Act hmanga zawh chiannaah, Horticulture department-in July 30, 2019 khan mau/rua lak luh chungchangah agreement siampui an la neih loh thu an tarlang tih a sawi a ni.

Flagship programme ni si, sorkar official lamin an hriatpui loh thil a awm chuan ngaih a tiṭha lo tih sawiin Lalduhoma chuan, "Mipui lú a tihai lo thei lo. Sorkar flagship programme meuh mimalin buaipui chiam mai hi thil ni thei pawh a ni lo. Nakinah department hi chìn luihtirin, a chî supply-tu nih tumin kan CM hi a hmanhlel em ni zawk?" a ti.

Lalduhoma sawi Ṭhenkhat

•Mizoramah rua leh mau tualṭo chi 25 a awm sa.

•Sik leh sá, mihring leh nungchate a nghawng theih dan tur zir chiang loin MNF sokar hmasain ram dang aṭangin mau chi 10 an lo la lut tawh.

•Kum 2006-ah Himachal Pradesh aṭangin Masso mau/rua 28,000 la lutin, ram hectare 150-a zauah chintir a ni a, 63 chauh an dam khawchhuak.

•Kum 2007-ah 22,000 an la lut leh a, 5,750 chauh an dam khawchhuak.

•BAFFACOS hnuaiah link road, nursery, bamboo bazar, bamboo technology park, common facility centre, showroom, post harvest storage centre, treatment plant, wholesale market 5, retail outlet 4 leh bamboo processing unit 15 din a ni a; hlawhtling a awm lo.

•CM hi Venus Bamboo neitu KK Shah nen inthurualin, Sairangah mau sâwngbâwlna an din a, agreement-in a phût aia tam daih - BDA aṭangin cheng nuai 374, ZIDCO aṭangin nuai 280, MIP aṭangin nuai 50 pek a ni. Venus Bamboo hian sum pûk, electric bill leh chhiah bá nuai 1,065 a la nei reng.



Share this Post

Login to comment
No Comments