France-in India hnenah Rafale jet hmasa ber a hlan

France chuan Thawhlehni khan India nena inremna an lo siam tawh angin a Rafale fighter jet hmasa ber chu India hnenah a hlan.

Rafale fighter jet hlanna hun hmang tur hian union defence minister Rajnath Singh chu France-ah hian a kal a, French defence minister Florence Parly pawh fighter jet hlanna in­khawmah hian a tel a ni.

France hian Indian Air Force (IAF) kutah Rafale hi Thawhlehni khan hlan tawh mah se jet hmasa palite chuan nakkum April-May inkarah an home base an pan dawn chauh a, February 2021-ah jet 18 chuan India ram a rawn thleng phawt ang a, April-May 2022-ah a dang 22-te chuan India an pan leh chauh ang. 

India leh France hian Rafale jet 36 leina tur hian inremna cheng vaibelchhe 59,000 hu an ziak a ni. 

Thlawhtheihna inhlanna hunah hian Rajnath Singh chuan, "Kan air force hi khawvela a lian ber palina niin Rafale aircraft hian min thuam chak leh zual ka ring a, India-in van boruaka a thuneihna, a area-a remna leh venhimna a kalpuina kawngah pawh nasa taka hmasawntirtu a nih ka ring," tiin a sawi.

Rajnath Singh hian thlawh­theihna inhlanna inkhawmah hian “shastra pooja” a hmang nghal a, jet-ah hian 'om' sign a ziak a, a hma lamah coconut, laddoo leh pangparte a dah bawk.

"India-ah chuan vawiin hian Dussehra, sual hnehna lawmna festival hman a ni. IAF Day ṭum 87-na a ni nghal bawk. Chuvang chuan, vawiin hi kawng hrang hrangin ni chhinchhiah tlak bik a ni," tiin a sawi bawk. 

Rafale Fighter Jet

QRafale Fighter Jet, Dassault Rafale tia sawi bawk hi French twin-engine, canard delta wing, multirole fighter aircraft, Dassault Aviation siam leh design a ni.

Q1986 aṭang daih tawh khan France ho hian an hmang ṭan tawh a, vawiin thlengin an la hmang.

QA hming awmzia hi 'gust of wind' tihna a ni a, India-in a leiah hian  European defence major MBDA Missile System siam Meteor missiles dah niin, Meteor no-escape zone hi  medium range air-to-air missile hman ṭhin tlangpui aiin a let thuma ṭha tura duan a ni. Ralthuam tonne 9 aia rit a keng thei bawk.




Share this Post

Login to comment
No Comments