Vanglaini - Heritage Quiz 2019 buatsaih a ni

KHAWTHLIR

MLA-in hawng

Aizawla Electric Veng Village Defence Party (VDP)-in an veng huam chhung, Power House bula site office building thar an neih chu nimin khan Aizawl North-III bialtu MLA C Lalmuanpuia'n a hawng.

Léngkhawm zai

Nimin khan Champhai Venglai community hall-ah Champhai East Area MUP Léngkhawm Zai Intihsiak neih a ni a, Art & Culture director R Hmingthanzuala'n a hmanpui a, MUP Gen.Hqrs. president Lalhuapzauva chu khualzahawm a ni. Intihsiaknaah hian Champhai East Area MUP chhunga branch pariat aṭangin member 373 an tel a; pakhatna Champhai Zion Vengin Rs. 15,000, pahnihna New Champhai-in Rs. 12,000 leh pathumna Champhai Venglai-in Rs. 9,000 an dawng

Thisen pe

Kristian Ṭhalai Pawl, Thakthing Veng Branch chuan nimin khan an kohhran hall-ah blood donation camp an huaihawt a, Synod Hospital tan thisen unit 31 an pe a, petute mipa 24 leh hmeichhia pasarih an ni.

Minister-in hawng

Social Welfare minister Dr K Beichhua chuan nimin khan Sihphir khua Sinners' Friend Rescue Centre annexe main building a hawng. Dr K Beichhua chuan, ruihhlo ngaite tisa leh thlarau lama enkawlna tur building thar hawn theiha a awm leh ta chuan nasa taka a tihphûr thu sawiin, "He hmun ka thlen hian ka rilruah 'Pên rawh, pên zel rawh' tih a lang a ni," a ti. In hi Lalmalsawmi, Bungkawnin a pasal F Lawmkima leh a fapa Jimmy Lalnunzira te hriatrengna atan Rs. 8,00,000 a thawh hmanga bul ṭan a ni a, mi tlawmngaite'n thawh belhin, cheng nuai 14 vel senga sak a ni.

No Plastic Rally

Mizo Chelsea Supporters’ Club chuan nimin khan AMC Ward-V huam chhung Zarkawt, Chanmari leh Electric Vengah 'No Plastic Rally' an buatsaih a, Ward-V councillor Rosiamngheta'n a vai liam. Rosiamngheta chuan, AMC-in plastic hman khapna dan a tih chhuah chu mi tam takin a takin an kalpui mek tih sawiin, "Keini chauh ni lo, kan tu leh fate tan ṭhahnemngai takin tun aṭanga hma kan lak a ngai a ni," a ti. Rally-ah hian kawngpui dunga plastic aṭanga thilsiam an paihte an chharkhawm a ni.

DAWNTISEI

Heritage Quiz 2019 buatsaih a ni

Indian National Trust for Art and Cultural Heritage (INTACH) Mizoram Chapter leh School Education department chuan nimin khan DIET Conference Hall, Aizawlah INTACH State Level Heritage Quiz 2019 an buatsaih a; khuallian, School Education director Lalzarmawii'n a hawng.

Quiz hawnna inkhawm chu INTACH Mizoram Chapter convener P Rohmingthanga'n a kaihruai a; khuallian Lalzarmawii chuan, Mizo nun hlui, nihna leh nunphungte chu vawnhim zel a pawimawh thu sawiin, chutiang kawnga

ṭhahnemngai turin intihsiaknaa tel naupangte a fuih. INTACH co-convener C Chawngkunga'n thu tawi a sawi bawk.

Intihsiakna hi pawl 7-10 zirlaite tana buatsaih a ni a, sikul thlan pariat aṭangin zirlai 50 an tel.

Team pakhatah zirlai pahnih zel an awm a; Samuel Lalhruaitluanga leh Jamie Vanlalruati, Dawrpui Centenary School-te chu pakhatna an ni a, national level intihsiakna, New Delhi-ah Mizoram aiawhin an tel ang.

INTACH Quiz hi New Delhi-a an hmunpui kaihhruainain kum tin ram pumah neih ṭhin a ni a, Mizoramah INTACH Mizoram Chapter-in School Education department thawhpuiin an buatsaih ṭhin. National level-a intihsiaknaah pawh Mizo zirlaite an che ṭha ṭhin hle tih an tarlang.

Heritage Quiz-in a tum ber chu, zirlai naupangte cultural heritage lama an hriatna leh thiamna tihpun leh an zirlaiah hmasawnna siamsak a ni.

Share this Post

Login to comment

No Comments