World Vision-in CARE Project an khâr

World Vision-in kum 23 chhung Mizorama CARE (Centre for AIDS Rehabilitation and Education) project an kalpui tawh khârna hun 'Care Project-World Vision India Closure Function cum GM Graduation Day' chu nimin khan Hrangbana College Golden Hall-ah an hmang a; Health minister Dr R Lalthangliana'n a hmanpui.

Health Minister chuan, Mizoramah tlawmngai pawl, non-governmental organisation tam tak awm mah se, World Vision kalphung chu a danglam bik a, entawn tur tam tak a awm tih a sawi a, "Mizorama World Vision hmalakna hrang hrangte a chhuanawm hle. Ziak leh chhiar thiam tam lamah Mizoram dinhmun chu chhuanawmin sang hle mah se, HIV+ve lama kan dinhmun erawh a chapopuiawm loh khawp mai," a ti a; Mizorama platform lian ber kohhran chu HIV/AIDS awareness lama ṭan la zel turin a ngen.

Dr R Lalthangliana chuan, HIV/AIDS leh ruihhlo vang­a harsatna tâwkte tisa damna bakah, thlarau damna leh an dam khawchhuahna tura pawimawh eizawnna nei lo tam takte'n an phâk tâwk eizawnna an neih theih nana World Vision-in remchang a siamsak chu lawmawm a tih thu a sawi a, "Tunah World Vision-in an hmalakna khâr mah se, chona thar tam tak an siam tawh te, sum tam tak sénga project hrang hrang an siamte chu tàwpsan loin Mizote'n kan chhunzawm tur a ni," a ti.

World Vision hi Aizawlah inbunin CARE Project chu kum 1996-ah an kalpui ṭan a, project hrang hrang pathum hnuaiah HIV+ve leh AIDS vei te, ruihhlo vanga buaite ṭanpui leh chhawmdawl hna an thawk ṭhin.

Mizorama an awm chhung­in, a hmasa berah CARE Project hmangin kum 1996-2011 chhung­in Aizawl district-a HIV/AIDS vei te, ruihhloa inchiu ṭhinte leh nawhchizuarte chhan­chhuah leh chhawmdawl hna an thawk a; kum 2012-2016 chhung­in CARE Balswasthya chu Aizawl, Kolasib leh Champhai district-ahte an kalpui. Kum 2017-2019 chhungin CARE Aizawl Project chu Aizawl, Kolasib leh Champhai district-ah an kalpui leh bawk.



Share this Post

Login to comment
No Comments